اسلام آباد۔22جون (اے پی پی):اسلام آباد فوڈ اتھارٹی (آئی ایف اے) نے لہتر اڑ روڈ پر واقع کیچپ فیکٹری میں کارروائی کے دوران ایک ہزار کلو گرام سے زائد غیر معیاری کیچپ کو معیاد ختم ہونے والے اجزاء، حفظان صحت کی خلاف ورزیوں اور غیر صحت بخش ماحول کے باعث تلف کر دیا ہے۔اے پی پی سے گفتگو کرتے ہوئے آئی ایف اے کی ڈپٹی ڈائریکٹر آپریشنز ڈاکٹر طاہرہ صدیق نے بتایا کہ اسلام آباد کے علاقے ترلائی میں واقع فیکٹری کو فوڈ اتھارٹی کی ٹیموں نے بار بار وارننگ دی اور فوڈ سیفٹی کے ضوابط کی عدم تعمیل پر چھاپہ مارا گیا۔ انہوں نے کہا کہ پیداواری یونٹ مناسب سٹوریج کے معیارات پر عمل کیے بغیر کیچپ کو کمرے کے درجہ حرارت پر سٹور کر رہا تھا۔ معائنہ کرنے والی ٹیم کو احاطے میں کئی ایکسپائرڈ کھانے کی اشیاء بھی ملی ہیں۔
ڈاکٹر طاہرہ صدیق نے کہا کہ کیچپ کم معیار کے مواد سے تیار کیا جا رہا تھا، معائنہ کے دوران ٹیم کو مختلف اشیائے خوردونوش کی تیاری میں استعمال ہونے والے کیمیکلز کا کوئی سرٹیفیکیشن نہیں مل سکا۔ اس نے مزید انکشاف کیا کہ یونٹ میں کارکنان یونیفارم نہیں پہنے ہوئے تھے اور معیاری حفاظتی طریقہ کار کو نظر انداز کر رہے تھے۔انہوں نے بتایا کہ فیکٹری کا فرش غیر محفوظ حالت میں پایا گیا جہاں پانی کھڑا تھا اور حفظان صحت کے اصولوں کی خلاف ورزی کرتے ہوئے کھانے کی اشیاء کو براہ راست فرش پر رکھا گیا۔آپریشن کے دوران 150 کلو گرام معیاد ختم ہونے والا گودا اور 10 کلو گرام ٹرائی سوڈیم سائٹریٹ ضبط کر کے تلف کر دیا گیا۔
مجموعی طور پر ایک ہزار کلو گرام غیر معیاری کیچپ کو بھی تلف کر دیا گیا۔فوڈ اتھارٹی کے حکام نے تصدیق کی کہ غیر محفوظ خوراک کی مصنوعات کی مزید پیداوار اور تقسیم کو روکنے کے لیے فیکٹری کو سیل کیا گیاہے۔یہ کارروائی وفاقی دارالحکومت میں فوڈ سیفٹی کے معیارات کی نگرانی اور مقامی مینوفیکچررز سے تعمیل کو یقینی بنانے کے لیے آئی ایف اے کی جاری کوششوں کا حصہ تھی۔آئی ایف اے حکام نے دیگر فیکٹریوں اور فوڈ یونٹوں کو متنبہ کیا ہے کہ وہ مناسب ضوابط پر عمل کریں یا اسی طرح کی کارروائی کا سامنا کرنے کیلئے تیار رہیں۔
