اسلام آباد۔17دسمبر (اے پی پی):اسلام آباد ٹریفک پولیس نے ٹریفک اشاروں کی خلاف ورزی کرنے والے ڈرائیورز کے خلاف کارروائیوں کو مزید تیز کرنے کا فیصلہ کیا ہے جس کے تحت اضافی خصوصی دستے تشکیل دے دئیے گئے ہیں جو ٹریفک بھیڑکے علاوہ ٹریفک قوانین کی خلاف ورزی کرنے والے عناصر کیخلاف بلاامتیاز کارروائیوں کا سلسلہ جاری رکھے ہوئے ہے۔
پولیس ترجمان کی طرف سے اتوار کو جاری بیان کے مطابق کیپیٹل پولیس آفیسر سیف سٹی ٹریفک کی خصوصی ہدایت پر وفاقی دارالحکومت اسلام آباد میں ٹریفک کے نظام کومزید بہتراور موثر بنانے اورشہرکو ٹریفک حادثات سے پاک کرنے کے لیے تمام تر اقدامات عمل میں لائے جارہے ہیں،اس سلسلے میں اسلام آبادکیپیٹل پولیس نے ٹریفک اشاروں کی خلاف ورزی کرنے والے ڈرائیورز کے خلاف کارروائی مزید تیز کرنے کا فیصلہ کیا ہے ۔
اسلام آبادکیپیٹل پولیس ٹریفک بھیڑ یونٹ کے علاوہ خصوصی دستے بھی وفاقی دارالحکومت کی شاہراہوں اور اہم مقامات پر تعینات کر دئیے گئے ہیں جوٹریفک قوانین خصوصا ٹریفک اشاروں کی خلاف ورزی کرنے والے ڈرائیورزکیخلاف سخت قانونی کارروائی عمل میں لا رہے ہیں۔
تمام زونل افسران کو ہدایات جاری کی گئیں ہیں کہ ٹریفک اشاروں کی خلاف ورزی پر بلا امتیاز کارروائی کی جائے، ایسے عناصرسے ہرگز کوئی رعایت نہ برتی جائے جو اپنے اور دوسروں کے لیے حادثات کا سبب بنتے ہیں۔
اسلام آباد کیپیٹل پولیس آگاہی ونگ کو بھی خصوصی ہدایات جاری کی گئی ہیں کہ شہریوں کو ٹریفک کی خلاف ورزی کے نقصانات اور دیگر ٹریفک قوانین سے متعلق آگاہی فراہم کرتے ہوئے بتایا جائے کہ ٹریفک قوانین پر عملدرآمد سے ہی ان کی جان ومال کی حفاظت ممکن ہے ۔
انہوں نے مزید کہا کہ اسلام آباد کیپیٹل پولیس ایف ایم ریڈیو 92.4 پر بھی ٹریفک قوانین کے متعلق خصوصی نشریات کا اہتمام کیا جائے، شہریوں سے اپیل ہے کہ ٹریفک اشاروںاور دیگر قوانین کا احترام کریں کیونکہ یہ آپ کی حفاظت کے ضامن ہیں۔
