اسلام آباد۔15مئی (اے پی پی):اسلام آباد ٹریفک پولیس کا ٹریفک قوانین کی خلاف ورزی کرنے والے عناصر کیخلاف کریک ڈائون جاری ہے، رواں سال بغیر ہیلمٹ موٹرسائیکل چلانے والے 15ہزارسے زائد موٹر سائیکل سواروں کے خلاف قانونی کارروائی عمل میں لائی گئی جبکہ متعدد موٹرسائیکل مختلف تھانہ جات میں بند بھی کئے گئے۔ کارروائی کا مقصد قیمتی جانوں کا تحفظ اور روڈنظم و ضبط قائم کرنا ہے۔پولیس ترجمان کے مطابق چیف ٹریفک آفیسر اسلام آباد کیپٹن (ر) سید ذیشان حیدر کے خصوصی احکامات کی روشنی میں اسلام آباد ٹریفک پولیس وفاقی دارالحکومت اسلام آباد میں مربوط ٹریفک کے نظام کو قائم کرنا اور ٹریفک قوانین پر عملدرآمد کو یقینی بنانے کیلئے ہمہ وقت مصروف عمل ہے۔
اس سلسلے میں اسلام آباد ٹریفک پولیس نے ہیلمٹ کے بغیر موٹرسائیکل چلانے والے ڈرائیورز کیخلاف خصوصی مہم جاری رکھتے ہوئے رواںسال15ہزارسے زائد ڈرائیورز کے خلاف قانونی کارروائیاں کیں جبکہ متعدد موٹرسائیکلوں کو مختلف تھانہ جات میں بند بھی کیا گیا،شہریوں کو روڈ سیفٹی اور ٹریفک قوانین کے متعلق آگاہی فراہم کرنے کیلئے اسلام آباد ٹریفک پولیس کے خصوصی دستوں نے مختلف سرگرمیوں کے دوران شہریوں کوآگاہی بھی فراہم کی۔چیف ٹریفک آفیسر اسلام آباد نے شہریوں سے اپیل کی ہے کہ موٹر سائیکل چلاتے وقت اپنی اور دوسروں کی جانوں کے تحفظ کو یقینی بنائیں۔اس سلسلے میں موٹرسائیکل چلاتے وقت ہیلمٹ کا استعمال ضرورکریں
یہ آپ کی قانونی ذمہ داری اور تحفظ بھی ہے۔انہوں نے مزید کہا کہ والدین کم عمر بچوں کو موٹرسائیکل چلانے کی ہرگز اجازت نہ دیں اور ٹریفک قوانین پر عملدرآمد کو یقینی بنائیں،شہریوں کے جان ومال کے تحفظ کو یقینی بنانے اور شہرمیں مربوط ٹریفک کا نظام اسلام آباد ٹریفک پولیس کی اولین ترجیحات میں شامل ہے۔
Short Link: https://urdu.app.com.pk/urdu/?p=597539
