اسلام آباد۔16مئی (اے پی پی):اسلام آباد ٹریفک پولیس کی مقررہ حد سے زیادہ وزن اٹھانے اور ٹریفک کے بہائو میں رکاوٹ بننے والی گاڑیوں کےخلاف قانونی کارروائی جاری ہے۔رواں سال کے دوران 11ہزار سے زائد گاڑیوں کے خلاف قانونی کارروائیاں عمل میں لائی گئیں ۔پولیس ترجمان کے مطابق چیف ٹریفک آفیسر اسلام آباد کیپٹن (ر) سید ذیشان حیدر کی خصوصی ہدایات پر اسلام آباد ٹریفک پولیس وفاقی دارالحکومت میں شہریوں کو ہرممکن سفری سہولیات فراہم کرنے اور حادثات سے محفوظ رکھنے کیلئے ٹریفک قوانین اور دوران سفر شاہراؤں پر حفاظتی ضابطوں پر عملدرآمد کیلئے ہمہ وقت مصروف عمل ہے تاکہ اسلام آباد میں مربوط ٹریفک کے نظام کو قائم رکھا جاسکے۔
اس ضمن میں اسلام آباد ٹریفک پولیس نے رواں سال کے دوران 11ہزار961 حد سے زیادہ وزن اٹھانے والی گاڑیوں کے خلاف قانونی کارروائیاں عمل میں لائیں جبکہ اسلام آباد ٹریفک پولیس کے اضافی دستے بھی ٹریفک قوانین پر عملدرآمد کیلئے شہر کے مختلف مقامات پر تعینات کئے گئے ہیں جو خصوصاً اسلام آباد ایکسپریس وے،کرنل شیر خان شہید روڈ،سرینگر ہائی وے اور شہرکی دیگر بڑی شاہراؤں اور مختلف مقامات پر شہریوں کے لیے محفوظ سفر کو یقینی بنانے کیلئے ہر ممکن مدد فراہم کر رہے ہیں تاکہ اسلام آباد کو حادثات سے مکمل محفوظ رکھا جا سکے۔ چیف ٹریفک آفیسر اسلام آباد نے زونل ڈی ایس پیز کو خصوصی ہدایات جاری کرتے ہوئے کہا کہ ایکسپریس ہائی وے
سرینگرہائی وے اور کرنل شیر خان شہید روڈپر تعینات نفری ٹریفک کے بہائو کو مزید موثربنائے،اس سلسلے میں شہری اپنی شکایات کے ازالے کیلئے اسلام آباد پولیس کی ہیلپ لائن "پکار”15پر رابطہ کر سکتے ہیں۔ انہوں نے مزید کہا کہ اسلام آباد پولیس حادثات کی روک تھام اور قانون کی بالا دستی کو مساوی بنیادوں پر یقینی بنانے کیلئے ہر ممکن اقدامات کر رہی ہے تاکہ شہر میں ٹریفک کی روانی کو برقرار رکھا جاسکے۔
