اسلام آباد۔25جولائی (اے پی پی):اسلام آباد ہائی کورٹ کے چیف جسٹس عامر فاروق نے بانی پی ٹی آئی کی جانب سے ان کے خلاف سپریم جوڈیشل کونسل میں شکایت دائر کئے جانے کے باعث کیس سے الگ ہونے کی استدعا مسترد کر دی۔
چیف جسٹس نے ریمارکس دیئے آپ کہہ رہے ہیں کہ میں مقدمے سے الگ ہو جائوں،ایسے نہیں ہوتا اس کا پورا طریقہ کار اور جسٹس بابر ستار کی ججمنٹ موجود ہے۔ اسلام آباد ہائی کورٹ کے چیف جسٹس عامر فاروق کی سربراہی میں دو رکنی ڈویژن بنچ نے بانی پی ٹی آئی اور بشریٰ بی بی کی نئے توشہ خانہ کیس میں گرفتاری کے خلاف کیس کی سماعت کی۔
بیرسٹر سلمان صفدر عدالت میں موجود نہ تھے۔ معاون وکیل انتظار حسین پنجوتھہ ایڈووکیٹ نے روسٹرم پر آ کر کہا کہ بانی پی ٹی آئی نے آپ کے خلاف سپریم جوڈیشل کونسل میں ریفرنس دائر کر دیا ہے ،ہم چاہتے ہیں کہ آپ اس سماعت سے دستبرداری اختیار کرلیں ، بانی پی ٹی آئی کا کیس نہ سنیں۔
چیف جسٹس عامر فاروق نے کہا یہ کوئی وجہ نہیں، اس طرح تو نیا ٹرینڈ شروع ہو جائے گا، ایسے نہیں ہوتا اس کا پورا طریقہ کار موجود ہے۔اس سے متعلق جسٹس بابر ستار کا فیصلہ موجود ہے۔ آپ سلما ن صفدر صاحب کو کہیں کہ وہ کیس میں میرٹس پر دلائل دیں جس کے بعد سماعت آئندہ ہفتے تک ملتوی کر دی گئی۔
