اسلام آباد۔31مارچ (اے پی پی):اسپیکر قومی اسمبلی سردار ایاز صادق اور ڈپٹی اسپیکر سید غلام مصطفیٰ شاہ نے ایسٹر کے پر مسرت موقع پر مسیحی برادری سے تعلق رکھنے والے اراکین پارلیمنٹ اور مسیحی برادری کو مبارکباد دی ہے۔اتوار کو یہاں جاری بیان میں انہوں نے اس امید کا اظہار کیا کہ ایسٹر پوری مسیحی برادری کے لیے خوشیوں اور خوشحالی کا پیغام ثابت ہو گا۔اسپیکر قومی اسمبلی نے جاری بیان میں کہا کہ حضرت عیسٰی علیہ السلام کو اللہ تعالیٰ نے محبت، رواداری اور بھائی چارے کی تبلیغ کے لیے مبعوث کیا۔ حضرت عیسٰی علیہ السلام کی محبت کا پیغام آج بھی تمام قومیتوں اور برادریوں میں ہم آہنگی کو فروغ دینے اور دنیا میں امن کو یقینی بنانے کے لیے مشعل راہ ہے۔
انہوں نے کہا کہ ملک کو درپیش چیلنجوں کا مقابلہ کرنے کے لیے ہمیں اپنی صفوں میں اتحاد پیدا کرنا ہو گا۔اسپیکر نے پاکستان میں بسنے والی تمام اقلیتوں کو آئین میں دیے گئے حقوق اور قائداعظم محمد علی جناح کے رہنما اصولوں کے مطابق تحفظ فراہم کرنے کے عزم کا اعادہ کیا۔انہوں نے پاکستان میں بسنے والی مسیحی برادری کے جذبہ حب الوطنی اور ملک کی ترقی اور خوشحالی کے لیے ان کی بے لوث خدمات کو سراہا۔
اس موقع پر ڈپٹی اسپیکر سید غلام مصطفیٰ شاہ نے بھی ایسٹر کے پر مسرت موقع پر مسیحی برادری سے تعلق رکھنے والے اراکین پارلیمنٹ اور مسیحی برادری کو مبارک باد دیتے ہوئے ملک کی تعمیر و ترقی میں مسیحی برادری کے کردار کو سراہا۔ انہوں نے کہا کہ اسلام اقلیتی برادری کو مساوی حقوق دیتا ہے اور ان کے ساتھ میانہ روی سے پیش آنے کا درس دیتا ہے۔انہوں نے قائد اعظم کی 11 اگست 1947 کے قومی اسمبلی کے خطاب کا حوالہ دیتے ہوئے کہا کہ پاکستان کا آئین تمام اقلیتی برادریوں کو اپنی مذہبی رسومات ادا کرنے کی مکمل آزادی دیتا ہے۔
