اسلام آباد۔3اکتوبر (اے پی پی):چیئرمین ایف بی آر راشد محمود لنگڑیال نے کہاہے کہ ایف بی آر میں اصلاحات کا مقصد محصولات میں زیادہ سے زیادہ اضافہ کرنا اور ٹیکس کی تعمیل کے لئے آسانیاں پید اکرنا ہے۔ انہوں نے یہ بات جمعرات کویہاں کنٹری ڈائریکٹر ناجی بین حسائن کی قیادت میں عالمی بینک کے وفد سے بات چیت کے دوران کہی۔ عالمی بینک کے وفد میں ٹیم لیڈ کنٹری اکانومسٹ ٹوبیاس اختر حق، سینئر اکانومسٹ لوسی پین اور پبلک سیکٹر سپیشلسٹ ارم توقیر شامل تھیں۔ ملاقات میں ایف بی آر کے ٹرانسفارمیشن پلان پر بات چیت کی گئی۔ چیئرمین ایف بی آر نے ایف بی آر کی ٹرانسفارمیشن کے لئے حکومت کے وژن اور وزیراعظم کی جانب سے منظور شدہ ٹرانسفارمیشن پلان کے بارے میں بتایا۔
انہوں نے ایف بی آر کے ٹرانسفارمیشن پلان اور اس کے تحت کی جانے والی اہم اصلاحات کے بارے میں بتایا۔ اس کے ساتھ ساتھ پاکستان ریزز ریونیو پراجیکٹ کے تحت کئے جانے والے اقدامات کے بارے میں بھی بات چیت کی گئی۔ چیئرمین ایف بی آر نے بتایا کہ اصلاحات کا مقصد محصولات میں زیادہ سے زیادہ اضافہ کرنا اور ٹیکس کی تعمیل کے لئے آسانیاں پید اکرنا ہے۔ انہوں نے ٹیکس کمپلائنس سے متعلق خامیوں کو دور کرنے کے لئے اصلاحات کے اہم شعبوں کو اجاگر بھی کیا جن میں ٹیکس پالیسی ریفارمز، ڈیجیٹلائزیشن کے اقدامات، انسانی وسائل کی صلاحیت میں اضافہ، انسداد سمگلنگ اقدامات، اور وسیع پیمانے پر ٹیکس ایڈمنسٹریشن میں اصلاحات شامل ہیں۔عالمی بینک کے کنٹری ڈائریکٹر نے ایف بی آر ٹرانسفارمیشن پلان کے تحت کئے جانے والے اقدامات کی مکمل حمایت کا یقین دلایا اور پاکستان میں محصولات بڑھانے کی کوششوں میں بینک کی مستقل حمایت کا اعادہ کیا۔
Short Link: https://urdu.app.com.pk/urdu/?p=508195
