لاہور۔21اگست (اے پی پی):قومی کرکٹ ٹیم کے کپتان بابراعظم نے کہا ہے کہ افغانستان کے خلاف سیریز میں ہر کھلاڑی میچ وننگ پرفارمنس دکھانے کیلئے بے تاب ہے، میں بحیثیت کپتان سیریز کیلئے بہت پرجوش ہوں اور میرا تمام کھلاڑیوں کو بھی یہی پیغام ہے کہ خودپریقین رکھیں اور میدان میں سوفیصدکارکردگی دکھانے کی کوشش کریں۔ ترجمان پاکستان کرکٹ بورڈ کے مطابق اہم کرکٹ سیزن کیلئے قومی ٹیم کی تیاریوں کا آخری مرحلہ کل منگل سے شروع ہورہا ہے جب پاکستانی کرکٹ ٹیم بابراعظم کی قیادت میں افغانستان کے خلاف پہلا ون ڈے انٹرنیشنل کھیلنے مہندا راجا پاکسے انٹرنیشنل اسٹیڈیم میں داخل ہوگی۔
قومی ٹیم جسے ایشیا کپ اور پھر ورلڈ کپ کھیلنا ہے ،رواں سال نیوزی لینڈ کے خلاف ون ڈے سیریز 4-1 اور سری لنکا کے خلاف ٹیسٹ سیریز دو صفر سے جیت چکی ہے اور افغانستان کے خلاف سیریز اسے اپنے کامبی نیشن کی فائنل ٹیوننگ کا موقع فراہم کرے گی۔
سیریز کا دوسرا ون ڈے چوبیس اگست کو ہمبنٹوٹا اور تیسرا ون ڈے چھبیس اگست کو کولمبو میں کھیلا جائے گا۔کپتان بابراعظم کا پی سی بی ڈیجیٹل سے بات کرتے ہوئے کہنا ہے کہ تمام کھلاڑی ایک یونٹ کی حیثیت سے ایک دوسرے کے ساتھ بہت انجوائے کررہے ہیں، ٹیم میں چند نئے چہرے ہیں جن کے لیے نیک تمنائیں ہیں کہ وہ چیلنجز میں پورا اتریں ، بیشتر لڑکے مختلف لیگز کھیلتے آئے ہیں لیکن جب آپ پاکستان کا اسٹار پہنتے ہیں تو مختلف جذبات ہوتے ہیں، میں بحیثیت کپتان آنے والی کرکٹ کے لیے بہت پرجوش ہوں، سری لنکا کے خلاف سیریز کی جیت سے ہمارا مومینٹم بنا ہوا ہے،قومی ٹیم کا حالیہ ون ڈے ریکارڈ دیگر تمام ٹیموں سے اچھا رہا ہے، 2022 کے آغاز سے اب تک گرین شرٹس نے سترہ میں سے تیرہ ون ڈے انٹرنیشنل جیتے ہیں۔
رواں سال مئی میں ٹیم نے آئی سی سی کی عالمی ون ڈے رینکنگ میں پہلی مرتبہ پہلی پوزیشن حاصل کی،اگر گرین شرٹس نے افغانستان کے خلاف تینوں ون ڈے جیت لئے تو وہ دوبارہ عالمی ون ڈے رینکنگ میں پہلے نمبر پر آجائے گی۔
بابراعظم کا کہنا ہے کہ ہماری تمام تر توجہ ایشیا کپ اور ورلڈ کپ کھیلنے پر مرکوز ہے، بڑے ایونٹس سے قبل افغانستان کی سیریز سے فائدہ ہوگا کیونکہ ہم ایشین کنڈیشنز میں کھیل رہے ہیں لہذا ہمیں ردھم حاصل کرنے میں مدد ملے گی ، افغانستان کی ٹیم میں چند اچھے کھلاڑی ہیں اور شائقین کو اس سیریز میں اچھی کرکٹ دیکھنے کو ملے گی۔ان کا کہنا ہے کہ اسکواڈ میں چند اچھے کھلاڑیوں کا اضافہ ہوا ہے ، فہیم اشرف ان آئوٹ ہوتے رہے ہیں لیکن انہوں نے حالیہ دنوں میں اچھا پرفارم کیا ہے یقینًا آل رائونڈر کی حیثیت سے ان کی موجودگی سے ٹیم کو استحکام ملے گا۔
انہوں نے کہا کہ طیب طاہر نے ایمرجنگ ایشیا کپ اور سعود شکیل نے سری لنکا کے خلاف ٹیسٹ سیریز میں عمدہ کارکردگی دکھائی ہے ،میں اس بات سے بہت متاثر ہوا ہوں کہ سعود شکیل نے خود کو بہت تیزی سے جدید دور کی کرکٹ میں ڈھالا ہے،یہ پاکستان کرکٹ کے لیے خوش آئند بات ہے ،اگرچہ افغانستان نے ون ڈے فارمیٹ میں پاکستان کو کبھی بھی نہیں ہرایا ہے تاہم اس نے اس سیریز سے قبل بنگلہ دیش کو دو ایک سے شکست دی ہے۔
بابراعظم نے کہا کہ ان کے کھلاڑی اس سیریز کو میچ وننگ پرفارمنس دکھانے کے لیے ایک چیلنج سمجھ رہے ہیں اور ہر کھلاڑی میچ وننگ پرفارمنس دکھانے کے لیے بے تاب ہے،اس کا اندازہ اس بات سے لگایا جاسکتا ہے کہ حالیہ دنوں میں مختلف کھلاڑی مین آف دی میچ ایوارڈ جیتنے میں کامیاب رہے ہیں ۔اگر آپ بڑے ٹورنامنٹس میں پرفارمنس دیتے ہیں تو اس سے نہ صرف ٹیم اور انفرادی کھلاڑی کا مورال بلند ہوتا ہے۔
انہوں نےکہاکہ افتخار احمد اور سلمان علی آغا کی موجودگی سے مڈل آرڈر بیٹنگ کو حوصلہ ملا ہے،ہماری ٹاپ آرڈر بیٹنگ پہلے ہی سیٹ ہے، اسپن بولنگ مضبوط ہوئی ہے،ہمارے پاس شاہین شاہ آفریدی ، نسیم شاہ اور حارث رئوف کی شکل میں بہترین پیس اٹیک موجود ہے،بائولرز بڑے ٹورنامنٹس جتواتے ہیں اور مجھے ان پر بھروسہ ہے کہ وہ ہمیں بڑے ٹورنامنٹس جتوائیں گے۔ بابراعظم کی کپتانی میں پاکستانی ٹیم نے 26میں سے 17ون ڈے میچز جیت رکھے ہیں۔
Short Link: https://urdu.app.com.pk/urdu/?p=381222
