اسلام آباد۔10مئی (اے پی پی):چیئرمین سینیٹ سید یوسف رضا گیلانی نے پاک بھارت مکمل اور فوری جنگ بندی کے اعلان کا خیرمقدم کیا اور کہا کہ جنوبی ایشیا میں پائیدار امن کا قیام تنازعہ جموں و کشمیر کے اقوامِ متحدہ کی سلامتی کونسل کی قراردادوں کے مطابق حل اور دیگر مرکزی مسائل بالخصوص سندھ طاس معاہدہ کے حل میں ہے۔
سینیٹ سیکرٹریٹ کے میڈیا ڈائریکٹوریت کی طرف سے جاری بیان کے مطابق چیئرمین سینیٹ نے کہا کہ میں ان تمام دوست ممالک بشمول چین، امریکہ، ترکیہ، سعودی عرب، یو اے ای اور ایران کا شکریہ ادا کرتا ہوں جو اس مُشکل گھڑی میں ہمارے ساتھ کھڑے ہوئے۔ انہوں نے کہا کہ یہ پیش رفت مکالمے کی طاقت اور تنازع سے گریز کی اہمیت کا ثبوت ہے، امید ہے یہ اقدام علاقائی امن، استحکام اور باہمی احترام کی مستقل راہ کا آغاز ہوگا۔ چیئر مین سینیٹ نے کہا کہ جنوبی ایشیا کے عوام خوف اور تنازع سے پاک مستقبل کے حقدار ہیں ۔
انہوں نے کہا کہ جنگ بندی خوشحالی، تعاون اور انسانی وقار کو ترجیح دینے کا سنہری موقع ہے۔ چیئرمین سینیٹ نے آرمی چیف کی قیادت اور مسلح افواج کی بہادری کو خراج تحسین پیش کیا اور تمام افواج کو مبارکباد پیش کی جن کی بہادری اور انتھک محنت نے اس جنگ میں ہمیں فتح سے ہمکنار کیا ہے، قوم کو خوشی منانی چاہیے اور شہادت پانے والوں کے لیے دعا بھی کرنی چاہیے۔
انہوں نے پاک فوج اور پاک فضائیہ کی کامیابیوں کو سراہا اور کہا کہ پاکستان کی مسلح افواج قومی سلامتی کی ضامن اور امن کے استحکام کی بنیاد ہیں ۔انہوں نے انٹرپارلیمنٹری سپیکرز کانفرنس کے بانی کی حیثیت سے پارلیمانی سفارتکاری کی اہمیت پر زور دیا اور کہا کہ مسئلہ کشمیر کو اقوام متحدہ کی قراردادوں اور بین الاقوامی قانون کے مطابق حل کرنا ہو گا ۔
Short Link: https://urdu.app.com.pk/urdu/?p=595500
