راولپنڈی۔14مئی (اے پی پی):ڈائریکٹر جنرل پی ایچ اے راولپنڈی احمد حسن رانجھا نے کہا ہے کہ پوری قوم اپنی بہادر اور عظیم افواج کو بھارتی جارحیت کا بروقت اور مؤثر جواب دینے پر خراج تحسین پیش کرتی ہے۔ ان کا کہنا تھا کہ "آپریشن بنیان مرصوص” کی کامیابی نے بھارت جیسے بزدل دشمن کو ایسا سبق سکھایا ہے کہ اب پاکستان کا دفاع ناقابل تسخیر بن چکا ہے۔
اپنے جاری کردہ بیان میں احمد حسن رانجھا نے کہا کہ پاکستان ایئر فورس نے ملک کے دفاع میں اپنی پیشہ ورانہ مہارت کا مظاہرہ کرتے ہوئے ایک نئی تاریخ رقم کی ہے۔ بھارت کسی غلط فہمی میں نہ رہے، پاکستانی فضائیہ اور دیگر مسلح افواج نے بھارتی غرور خاک میں ملا دیا ہے۔ انہوں نے مزید کہا کہ قوم نے ہر قدم پر اپنی افواج کے ساتھ کھڑے رہنے کا عزم کر رکھا ہے۔
پاکستان آرمی کی مہارت اور جنگی حکمت عملی نے بھارتی فوج کو جنگ کے آغاز پر ہی سفید جھنڈا لہرانے پر مجبور کر دیا اور دشمن کو بھاری جانی و مالی نقصان اٹھانا پڑا۔ احمد حسن رانجھا نے مختلف شہروں میں بھارتی ڈرونز کو بروقت نشانہ بنانے اور مار گرانے پر پاکستان آرمی اور ایئر فورس کو خراج تحسین پیش کیا۔ انہوں نے کہا کہ بھارتی غرور کی حقیقت اس کے رافیل طیاروں کے ملبے کی صورت زمین پر پڑی دیکھی جا سکتی ہے۔
ان کا مزید کہنا تھا کہ بھارت کو یہ حماقت نہیں کرنی چاہیے کہ وہ پاکستان کی طرف میلی آنکھ سے دیکھے۔ قوم اپنی بہادر افواج کے ساتھ چٹان کی طرح کھڑی ہے اور بھارت کا تکبر ہر محاذ پر شکست کھائے گا۔
Short Link: https://urdu.app.com.pk/urdu/?p=596909
