واشنگٹن ۔3ستمبر (اے پی پی):اقوام متحدہ میں امریکا کے سابق سفیر بل رچرڈسن 75 سال کی عمر میں انتقال کر گئے ہیں ۔برطانوی نشریاتی ادارے کے مطابق رچرڈسن سنٹر فار گلوبل انگیجمنٹ کے نائب صدر مکی برگ مین نے ایک بیان میں بتایا کہ سابق امریکی سفارت کار، کانگریس مین، توانائی کے سیکریٹری اور نیو میکسیکو کے گورنر جنہوں نے مختلف مطلق العنان حکومتوں کے زیر حراست امریکیوں اور دیگر افراد کی رہائی کو یقینی بنا کر عالمی سطح پر اپنی شناخت بنائی 75 برس کی عمر میں انتقال کر گئے ہیں ۔
انہوں نے بتایا کہ رچرڈسن نے 1982 سے 1996 تک امریکی ایوان نمائندگان کے ڈیموکریٹک رکن کے طور پر خدمات انجام دیں، پھر صدر بل کلنٹن کے تحت اقوام متحدہ میں امریکی سفیر اور توانائی کے سیکرٹری کے طور پر خدمات انجام دیں۔
رچرڈسن نیو میکسیکو کے گورنر کے طور پر منتخب ہوئے2003 سے 2011 تک خدمات انجام دیں۔انہوں نے مزید بتایا کہ رچرڈسن نےاپنی پوری زندگی دوسروں کی خدمت میں گزاری 2011 میں گورنری چھوڑنے کے فوراً بعد اس نے اپنی غیر منافع بخش فاؤنڈیشن، رچرڈسن سنٹر فار گلوبل انگیجمنٹ کا آغاز کیا، جہاں اس نے نظر بند امریکیوں کی رہائی کے لیے اپنے کام کی تجدید کی۔
