نئی دہلی ۔ 17 اگست (اے پی پی) بھارت کی سب سے قدیم سیاسی جماعت کانگریس نے کشمیر کے حالات پر اقوام متحدہ کی سلامتی کونسل میں ہونے والے بحث کو مودی حکومت کی خارجہ پالیسی کی ناکامی قرار دیتے ہوئے کہا ہے کہ وزیر اعظم نریندر مودی اس اجلاس کو منسوخ کرانے میں ناکام ہوگئے ہیں ۔ کانگریس کے ترجمان ابھیشیک منو سنگھوی نے یہاں پارٹی ہیڈکوارٹر میں ایک پریس کانفرنس میں کہا کہ پارٹی اس معاملے کو بہت سنگین مانتی ہے۔ اقوام متحدہ میں کشمیر کے معاملے میں بحث ہونے کا ذکر کرتے ہوئے انہوں نے الزام لگایا کہ وزیر اعظم خاموش ہیں۔ شروع سے ہی خارجہ پالیسی ایک لازمی ستون رہاہے، اسے تبدیل نہیں کیا جا سکتا۔ کشمیر کے معاملے کو بین الاقوامی طور پر اٹھایا جارہا ہے جو مکمل طور پر خارجہ پالیسی کی ناکامی ہے۔بھارتی وزیر خارجہ اسی موضوع پر چین جاتے ہیں اور ناکام لوٹتے ہیں جبکہ چین پاکستان کی سیاسی اور سفارتی حمایت میں سکیورٹی کونسل کا اجلاس منعقد کرا لیتا ہے جو بھارتی خارجہ پالیسی کی ناکامی ہے۔
