واشنگٹن ۔ 08 مارچ (اے پی پی) اقوام متحدہ کے فلسطین کے لیے انسانی حقوق کے مندوب مائیکل لینک نے غزہ میں اسرائیلی فوج کی طرف سے انسانی حقوق کی پامالیوں اور نہتے مظاہرین کے قتل عام پر اسرائیلی ریاست سے باز پرس کا مطالبہ کیا ہے۔مرکزاطلاعات فلسطین کے مطابق مائیکل لینک نے واشنگٹن میں ایک پریس کانفرنس سے خطاب میں کہا کہ اسرائیل کو غزہ کی پٹی میں مظاہرین کے خلاف طاقت کے استعمال سے باز آنا ہوگا۔ انہوں نے کہا کہ اقوام متحدہ کے انسانی حقوق کونسل کی طرف سے غزہ میں اسرائیلی ریاست کو انسانیت کے خلاف جرائم کا مرتکب قرار دینے کے بعد اسرائیلی ریاست سے باز پرس ضروری ہے۔ اس امر کی تحقیقات ہونی چاہئیں کہ اسرائیلی فوج غزہ کی پٹی میںمظاہرین کے خلاف طاقت کیوں کررہی ہے۔واضح رہے کہ حال ہی میں اقوام متحدہ کی انسانی حقوق کونسل کی طرف سے جاری کردہ ایک رپورٹ میں کہا تھا کہ اسرائیلی فوج غزہ کی پٹی میں فلسطینی مظاہرین کے خلاف طاقت کا اندھا دھند استعمال کررہی ہے ،جوانسانیت کے خلاف جرائم کے زمرے میں آتے ہیں۔
