اقوام متحدہ ۔30اگست (اے پی پی):اقوام متحدہ کے سیکرٹری جنرل انتونیو گوتریش کے ترجمان سٹیفن ڈوجارک نے کہا اقوام متحدہ پاکستانی حکومت کے ساتھ مل کر سیلاب متاثرین کی ضروریات کو پورا کرنے کے لیے فوری امدادی سرگرمیوں کے لیے 160 ملین امریکی ڈالر کی فلیش اپیل کا منصوبہ بنا نے جارہاہے ۔
انہوں نے کہاکہ اقوام متحدہ کی ٹیم پاکستان بھر میں شدید بارشوں اور سیلاب سے نمٹنے کے لیے اپنا ردعمل تیز کر رہی ہے جس میں مبینہ طور پر ایک ہزار سے زائد افراد ہلاک ہو چکے ہیں۔ انہوں نے کہا کہ یہ اپیل بروز منگل بیک وقت جنیوا اور اسلام آباد سے شروع کی جائے گی۔انہوں نے کہا کہ اقوام متحدہ پہلے ہی سیلاب متاثرین کے لیے تقریباً 7 ملین ڈالر جمع کر چکا ہے جس میں موجودہ پروگراموں اور وسائل میں انتہائی ضروری ضروریات کو پورا کرنا شامل ہے۔
انہوں نے کہا کہ جاری امداد میں خوراک کی امداد اور غذائیت، طبی سامان اور خدمات، محفوظ پانی، زچگی کی صحت کی امداد، مویشیوں کی ویکسینیشن اور پناہ گاہیں شامل ہیں۔ترجمان نے کہا کہ اس کے علاوہ، اقوام متحدہ کے سینٹرل ایمرجنسی رسپانس فنڈ نے صحت، غذائیت، خوراک، پانی، صفائی ستھرائی اور حفظان صحت کی خدمات فراہم کرنے کے لیے 3 ملین ڈالر مختص کیے ہیں جن کی سب سے زیادہ ضرورت ہے۔
Short Link: https://urdu.app.com.pk/urdu/?p=324494
