اسلام آباد۔2اپریل (اے پی پی):اقوام متحدہ کی انسانی حقوق کونسل نے پاکستانی سفیر ڈاکٹر بلال احمد کی جانب سے پیش کردہ او آئی سی کی قرارداد کثرت رائے سے منظور کرلی جس کا عنوان ”مشرقی بیت المقدس سمیت مقبوضہ فلسطینی علاقوں میں انسانی حقوق کی صورتحال، احتساب اور انصاف کو یقینی بنانے کی ذمہ داری” ہے۔
جنیوا میں پاکستانی مشن کی طرف سے ایکس پر پوسٹ میں کہا گیا ہے کہ اقوام متحدہ کی انسانی حقوق کونسل نے او آئی سی قرارداد کثرت رائے سے منظور کرلی یہ قرار داد پاکستانی سفیر ڈاکٹر بلال احمد کی جانب سے پیش کی گئی ہے، قرار داد کا عنوان ”مشرقی بیت المقدس سمیت مقبوضہ فلسطینی علاقوں میں انسانی حقوق کی صورتحال، احتساب اور انصاف کو یقینی بنانے کی ذمہ داری” ہے۔ قرار داد میں غزہ میں نسل کشی پر اکسانے کی روک تھام اور سزا وار ٹھرانے کی ضرورت پر زور دیا گیا ہے۔
قرار داد میں مقبوضہ فلسطینی علاقوں میں اسرائیل کے قبضے کے غیر قانونی ہونے کے بارے میں عالمی عدالت انصاف (آئی سی جے) کے فیصلے پر توجہ مرکوز کرنے پر بھی زور دیا گیا ہے۔ قرار داد میں فلسطینیوں کے خلاف اسرائیل کے غیر قانونی اقدامات کی بھی مذمت کی گئی، جس میں خواتین اور لڑکیوں کے خلاف جنسی تشدد کے واقعات شامل ہیں۔ قرار داد میں مقبوضہ فلسطینی حدود میں بین الاقوامی قانون کی سنگین خلاف ورزیوں کے لئے استثنی کو ختم کرنے اور احتساب کا بھی مطالبہ کیا گیا ہے۔
Short Link: https://urdu.app.com.pk/urdu/?p=577998
