واشنگٹن ۔8فروری (اے پی پی):امریکی ریاست الاسکا میں کوسٹ گارڈز کو لاپتا ہو جانے والے طیارے کا ملبہ مل گیا ہے، طیارے میں سوار تمام 10 افراد ہلاک ہو گئے ہیں۔ اردو نیوز کے مطابق الاسکا کے محکمہ پبلک سیفٹی نے بتایا ہے کہ بیرنگ ایئر کا یہ طیارہ یونالکیٹ سے نوم شہر جا رہا تھا تاہم پرواز کے آدھے گھنٹے سے کم وقت کے بعد ہی اس کا رابطہ منقطع ہو گیا ۔
کوسٹ گارڈز کے ترجمان مائیک سیلرینو نےبتایا کہ دو امریکی کوسٹ گارڈ ریسکیو تیراک طیارے کے ملبے تک پہنچے اور انہوں نے تین لاشیں دیکھیں جبکہ دیگر سات افراد کے بارے میں خدشہ ہے کہ وہ ملبے تلے دبے ہوئے ہیں۔انہوں نے کہا کہ بدقسمتی سے یہ ایسا حادثہ نہیں جس میں کوئی زندہ بچ سکا ہو۔الاسکا کے نیشنل ٹرانسپورٹیشن سیفی بورڈ کے سربراہ کلنٹ جونسن نے بتایا کہ اس حادثے میں 10 افراد ہلاک ہو گئے ہیں۔
انہوں نے کہا کہ اب جب کہ ملبہ مل گیا ہے اور بدقسمتی سے 10 افراد ہلاک ہو چکے ہیں، اب وقت ہے کہ ہم کمر کس لیں اور کام میں لگ جائیں۔حکام کا کہنا ہے کہ سخت موسمی حالات کی وجہ سے سرچ آپریشن میں مشکلات پیش آئیں اور اس دور دراز مقام سے شاید ڈیڈ باڈیز کو نکالنے میں مزید کچھ دن لگ جائیں۔کوسٹ گارڈ کے مطابق یہ ملبہ نوم کے شمال مشرق میں 55 کلومیٹر فاصلے پر واقع مقام سے ملا ہے۔
انہوں نے بتایا کہ یہ طیارہ نورٹن ساؤنڈ جو بیرنگ سمندر کا ایک حصہ ہے، اس کے برفانی پانیوں کے اوپر ساحل سے لگ بھگ 19کلومیٹر دور لاپتا ہو گیا تھا۔
Short Link: https://urdu.app.com.pk/urdu/?p=557376
