امارات ہلال احمر کا یمن شہر المکلا میں سالانہ "رمضان افطار منصوبہ” کا آغاز

حضرموت۔4مارچ (اے پی پی):امارات ہلال احمر نے یمن کے گورنریٹ حضرموت کے شہر المکلا میں سالانہ "رمضان افطار منصوبہ” کا آغاز کر دیا ہے۔امارات نیوز ایجنسی وام کے مطابق رمضان افطار منصوبہ یمنی عوام کے لیے متحدہ عرب امارات کی جاری انسانی اور امدادی کاوشوں کا حصہ ہے۔

حضرموت گورنریٹ میں امارات ہلال احمر کے نمائندہ اور ترقی و بین الاقوامی تعاون کے مشیر، حامد راشد الشامسی نے اس منصوبے کی اہمیت کو اجاگر کرتے ہوئے کہا کہ یہ اقدام متحدہ عرب امارات کے انسانی ہمدردی کے مشن سے غیر متزلزل وابستگی کی عکاسی کرتا ہے۔

انہوں نے مزید کہا کہ یہ منصوبہ دونوں اقوام کے درمیان بھائی چارے اور تعاون کے رشتوں کو مزید مستحکم کرتا ہے۔اس افطار منصوبے سے سینکڑوں شہری مستفید ہوئے، جنہوں نے متحدہ عرب امارات کی اس فیاضانہ پہل پر دلی شکریہ ادا کیا اور مقدس مہینے میں بروقت انسانی مدد فراہم کرنے پر امارات ہلال احمر کے لیے گہری قدردانی کا اظہار کیا۔

Short Link: https://urdu.app.com.pk/urdu/?p=568684