قاہرہ۔24اپریل (اے پی پی):سعودی عرب نے اپنے اس دعوے کا اعادہ کیا ہے کہ امن مشرق وسطیٰ کے لیے سٹریٹجک انتخاب ہے۔ العربیہ اردو کے مطابق یہ بات سعودی عرب کے نائب وزیر خارجہ ولید الخریجی نے مصر کے دارالحکومت قاہرہ میں عرب لیگ کے 163 ویں وزارتی اجلاس کے دوران کہی۔
انہوں نے کہا کہ علاقائی سلامتی کے لیے بین الاقوامی قانونی قراردادوں، عرب امن اقدام اور مشرقی القدس سمیت 1967 کی سرحد پرمشتمل ایک آزاد فلسطینی ریاست کے قیام پر مبنی مسئلہ فلسطین کے منصفانہ حل کی تلاش کو تیز کرنے کی ضرورت ہے۔ فلسطینی عوام کے لیے اپنے ملک کی حمایت پر زور دیتے ہوئے انہوں نے کہا کہ غزہ کی پٹی میں جنگ بندی برقرار رکھنے کی ضرورت ہے، قابض اسرائیل بین الاقوامی قوانین کا احترام کرے اور ان جرائم کو روکے جو وہ فلسطینی لوگوں کے خلاف کر رہا ہے۔
انہوں نے سعودی عرب کی جانب سے فلسطینی عوام کو ان کی سرزمین سے بے گھر کرنے کے مطالبات کو مکمل طور پر مسترد کر دیا۔ انہوں نے دو ریاستی حل کو آگے بڑھانے کے لیے ’’انٹرنیشنل کولیشن فار دی امپلیمنٹیشن آف دی ٹو سٹیٹ ریزولوشن‘‘کے ذریعے شراکت دار اور دوست ممالک کے ساتھ سعودی عرب کے مسلسل رابطے کا حوالہ دیا۔
Short Link: https://urdu.app.com.pk/urdu/?p=586885
