اسلام آباد۔9فروری (اے پی پی):نگران وفاقی وزیر داخلہ ڈاکٹر گوہر اعجاز نے کہا ہے کہ انتخابات کے نتائج توقع کے مطابق ہیں، تمام بڑے سیاسی ادارے عمومی طور پر ان نتائج سے مطمئن ہیں جو بدلتے ہوئے حقائق اور قوم کے مزاج کی بھی عکاسی کرتے ہیں، یہ سب اس حقیقت کی طرف اشارہ کرتے ہیں کہ انتخابات واقعی آزادانہ اور منصفانہ تھے،جذباتی سیاسی ماحول اور عوامی جذبات ریاست کے فیصلہ سازی کے عمل کو متاثر کرنے والے سنگین خدشات تھے، یہ انتخابات پاکستانی قوم کے لئے خوشحالی کا باعث بنیں گے۔
جمعہ کو اپنے بیان میں نگران وفاقی وزیر داخلہ نے کہا کہ ہم انتہائی اطمینان کے ساتھ پاکستان میں غیر معمولی سکیورٹی صورتحال میں انتخابات 2024 کے پرامن انعقاد کا ذکر کرتے ہیں۔ ہزاروں کی تعداد میں مسلح افواج، دیگر قانون نافذ کرنے والے اداروں اور سویلین اہلکاروں کی ہزاروں مربع کلومیٹر کے متنوع علاقوں اور سخت موسم میں محدود وقت کے اندر تعینات کرنا کوئی معمولی کارنامہ نہیں تھا۔اس عظیم مشق کے کامیاب انعقاد کو ریاست کے تمام اداروں کی اجتماعی کوششوں سے ہی منسوب کیا جا سکتا ہے۔
پاکستان میں دہشت گردی کے واقعات تیزی سے بڑھ رہے ہیں اور بلوچستان میں دہشت گرد تنظیموں جیسے ٹی ٹی پی، داعش اور غیر ملکی سپانسر شدہ عسکریت پسند تنظیموں کی مصدقہ اطلاعات موصول ہوئی ہیں جو قانون نافذ کرنے والے اداروں اور شہریوں پر حملے کر کے امن و امان کی سنگین صورتحال پیدا کرنے کی کوشش کر رہے ہیں تاکہ قوم کے اعتماد کو متزلزل کر کے انہیں اپنے جمہوری حق کے استعمال سے باز رکھیں۔ انہوں نے کہا کہ انتخابات سے پہلے، مسلح افواج اور دیگر قانون نافذ کرنے والے ادارے پورے ملک میں انٹیلی جنس کی بنیاد پر انسداد دہشت گردی کی کارروائیوں میں سرگرم عمل تھے۔
گزشتہ چند ہفتوں میں کئی سنگین واقعات کا سامنا ہوا جن میں شہریوں اور قانون نافذ کرنے والے اداروں کے ارکان کو شدید نقصان پہنچا۔ انتخابات سے صرف ایک دن قبل دہشت گردی کے واقعات میں 28 افراد جاں بحق اور 64 دیگرشدید زخمی ہوئے جس نے ریاست کو اپنے شہریوں کے تحفظ کو یقینی بنانے کے لئے متعدد اقدامات کرنے پر مجبور کیا، اس میں ملک بھر میں موبائل فون سروسز کو معطل کرنے کا مشکل فیصلہ بھی شامل ہے تاکہ دہشت گردوں کے روابط اور دہشت گردانہ کارروائیوں کو انجام دینے کے ذرائع سے روکا جا سکے۔ موبائل ڈیوائسز انسانی ہلاکتوں کے لئے جدید دھماکہ خیز آلات کو چلانے میں بھی استعمال ہوتی ہیں۔
انہوں نےکہا کہ ہمیں پوری طرح معلوم تھا کہ موبائل سروس کی معطلی سے پورے پاکستان میں انتخابی نتائج کی ترسیل متاثر ہوگی اور اس عمل میں تاخیر ہوگی، تاہم اس تاخیر اور ہمارے شہریوں کی سلامتی کے درمیان موبائل سروسز کی معطلی کا انتخاب کافی واضح تھا اور اس کا فیصلہ کیا گیا۔ حساس علاقوں خصوصاً خیبر پختونخوا اور بلوچستان میں پولنگ سٹیشنوں کے راستے میں آئی ای ڈیز کے امکان کو روکنے کے لئے مناسب بم ڈسپوزل کلیئرنس کرنا پڑی جس میں کافی وقت ضائع ہوا۔وسیع پیمانے پر پھیلے ہوئے پولنگ اسٹیشنوں اور خاص طور پر بلوچستان، خیبر پختونخوا اور یہاں تک کہ پنجاب اور سندھ کے دیہی علاقوں سے انتخابی نتائج کی فزیکل نقل و حمل، اس طرح کے وسیع حفاظتی اقدامات کے ساتھ ایک محنت طلب اور وقت طلب مشق تھی۔انتخابات کے نتائج توقع کے مطابق ہیں اور ان لاکھوں لوگوں کی امنگوں کی عکاسی کرتے ہیں جو ووٹ ڈالنے کے لئے لاکھوں کی تعداد میں باہر نکلے۔
تمام بڑے سیاسی ادارے عمومی طور پر ان نتائج سے مطمئن ہیں جو بدلتے ہوئے حقائق اور قوم کے مزاج کی بھی عکاسی کرتے ہیں، یہ سب اس حقیقت کی طرف اشارہ کرتے ہیں کہ انتخابات واقعی آزادانہ اور منصفانہ تھے۔وزیر داخلہ کا کہنا تھا کہ سخت حفاظتی اقدامات کے باوجود انتخابات کے دن پاکستان بھر میں دہشت گردانہ حملوں سمیت 61 پرتشدد واقعات ہوئے جن میں جدید ترین ہتھیاروں اور دھماکہ خیز آلات کا استعمال کیا گیا جس میں 16 شہریوں کی جانیں گئیں اور 54 دیگر زخمی ہوئے۔
ڈاکٹر گوہر اعجاز نے کہا کہ پاکستان کے آئین کے مطابق کسی بھی شکایت کی صورت میں عوام کو اب بھی قانونی آپشنز کا مکمل سہارا حاصل ہے۔ہم اس دن کے حوالے سے قومی مفاد کو سامنے رکھتے ہوئے درخواست کرتے ہیں کہ ہماری بات کو سمجھیں اور ہماری حمایت کریں۔ اس تاریخی مشق میں شامل تمام ادارے، خاص طور پر الیکشن کمیشن آف پاکستان جس کا سکیورٹی کی صورتحال پر بہت کم کنٹرول تھا، تنقید اور تذلیل کی بجائے تعریف اور شکر گزار ی کے مستحق ہیں۔
ذاتی مفادات رکھنے والے تفرقے کو بھڑکاتے رہیں گے کیونکہ وہ انتشار پیدا کرتے اور انتشار پروان چڑھاتے ہیں۔ ہم شہریوں اور سیاسی رہنمائوں سے درخواست کرتے ہیں کہ وہ انتخابی عملے کو بغیر کسی رکاوٹ کے اپنے فرائض سرانجام دینے دیں اور پولنگ سٹیشنز سے آر او آفس جانے والی سڑکوں کو بند کر کے الیکشن کمیشن آف پاکستان کے کام میں مزید تاخیر نہ کریں۔انہوں نےکہا کہ آئیے ہم مل کر عظیم کارنامے انجام دینے کے لئے مل کر کام کریں اور امید کرتے ہیں کہ یہ الیکشن پاکستانی قوم کے لئے خوشحالی کا باعث بنے گا۔
