اسلام آباد۔7مئی (اے پی پی):صدر مملکت آصف علی زرداری نے کہا ہے کہ انتہا پسند بھارتی حکومت نے پورے خطے کے امن و استحکام کو خطرے میں ڈال دیا ہے، بھارت کے جارحانہ اقدامات سے خطے کے لئے خطرناک نتائج نکلیں گے۔
ان خیالات کا اظہار انہوں نے اٹلی کے وزیر داخلہ میٹیو پیانٹیدوسی سے گفتگو کرتے ہوئے کیا جنہوں نے بدھ کو یہاں اپنے وفد کے ہمراہ ایوان صدر میں ان سے ملاقات کی۔ ایوانِ صدر کے پریس ونگ سے جاری بیان کے مطابق ملاقات میں وفاقی وزیر داخلہ و نارکوٹکس کنٹرول سینیٹر سید محسن رضا نقوی، وزیر برائے سمندر پار پاکستانیز چوہدری سالک حسین،
وزیر مملکت برائے داخلہ سینیٹر محمد طلال چوہدری اور اعلیٰ سرکاری حکام بھی موجود تھے۔ صدر مملکت نے اطالوی وزیر داخلہ کا خیرمقدم کرتے ہوئے کہا کہ پاکستان اٹلی کے ساتھ اپنے تعلقات کو بہت اہمیت دیتا ہے اور وہ مختلف شعبوں میں باہمی سود مند تعاون بہتر بنانے کیلئے پرعزم ہے۔ ملاقات میں باہمی دلچسپی کے مختلف شعبوں میں دوطرفہ تعاون بڑھانے پر تبادلہ خیال کیا گیا۔ صدر مملکت نے اطالوی وزیر داخلہ کے ساتھ پاکستان کے خلاف بھارتی بلا اشتعال فوجی جارحیت کا ذکر کرتے ہوئے کہا کہ انتہا پسند بھارتی حکومت نے پورے خطے کے امن و استحکام کو خطرے میں ڈال دیا ہے۔
صدر مملکت نے کہا کہ بھارت کے جارحانہ اقدامات سے خطے کے لئے خطرناک نتائج نکلیں گے۔ اطالوی وزیر نے گزشتہ شب پاکستان پر بھارتی حملے میں جانیں گنوانے والے شہداءکے اہلخانہ سے تعزیت کا اظہار کیا اور کہا کہ موجودہ صورتحال کے خاتمے کے لئے پاکستان کے تحفظات اپنی حکومت اور عالمی برادری تک پہنچائیں گے۔ اطالوی وزیر داخلہ نے کہا کہ پاکستان اور اٹلی انسانی سمگلنگ اور دہشت گردی کے خلاف تعاون کر رہے ہیں۔
انہوں نے کہا کہ دونوں ممالک کے درمیان اقتصادی تعاون کی بڑی گنجائش ہے، اٹلی میں 160,000 پاکستانی تارکین وطن اطالوی معاشرے اور ترقی میں مثبت کردار ادا کر رہے ہیں۔ صدر مملکت نے نازک حالات میں پاکستان کا دورہ کرنے پر اطالوی وزیر کا شکریہ ادا کیا۔ بعد ازاں اٹلی میں قانونی نقل مکانی ، ہنرمند لیبر کی نقل و حرکت آسان بنانے کیلئے پاکستان اور اٹلی کے مابین مفاہمت کی 2 یادداشتوں پر دستخط بھی کئے گئے۔
Short Link: https://urdu.app.com.pk/urdu/?p=594021
