غذر۔28اگست (اے پی پی):وفاقی وزیر برائے امور کشمیر گلگت بلتستان و سیفران انجینئر امیر مقام کو غذر میں حالیہ سیلابی صورتحال اور جاری ہنگامی امدادی و بحالی کاموں پر تفصیلی بریفنگ دی گئی۔وزارت امور کشمیر، گلگت بلتستان و سیفران کے مطابق ڈی جی گلگت بلتستان، ڈی ایم اے اور ضلعی انتظامیہ نے وفاقی وزیر کو غذر کے مختلف علاقوں میں حالیہ سیلاب سے ہونے والے نقصانات، متاثرہ آبادی، بند سڑکوں اور امدادی سامان اور جھیل کے سپل ویز کے بارے میں تفصیلی جائزہ پیش کیا۔
وفاقی وزیر نے این ایچ اے اور متعلقہ محکموں کو ہنگامی بنیادوں پر سڑکیں بحال کرنے کی ہدایت کی۔انجینئر امیر مقام نے تباہی کی شدت پر گہری تشویش کا اظہار کیا اور مقامی انتظامیہ اور عوام کو یقین دلایا کہ وفاقی حکومت فوری امداد اور طویل مدتی بحالی کے لیے مکمل تعاون فراہم کرے گی۔انہوں نے کہا کہ وزیر اعظم محمد شہباز شریف کی واضح ہدایت ہے کہ متاثرہ افراد تک پہنچنے اور علاقے میں معمولات زندگی بحال کرنے کے لیے کوئی کسر نہ چھوڑی جائے۔
وفاقی وزیر نے بریفنگ کے دوران کہا کہ وفاقی حکومت اس مشکل وقت میں غذر، گلگت بلتستان کے عوام کے شانہ بشانہ کھڑی ہے۔اس موقع پر وفاقی سیکرٹری امور کشمیر گلگت بلتستان و سیفران ظفر حسن، سابق وزیر اعلیٰ گلگت بلتستان حافظ حفیظ الرحمن، صوبائی وزیر خوراک غلام محمد، ممبر گلگت بلتستان اسمبلی نواز ناجی اور ہوم سیکرٹری جی بی بھی موجود تھے۔واضح رہے کہ وفاقی وزیر انجینئر امیر مقام وزیراعظم شہباز شریف کی خصوصی ہدایات پر گلگت بلتستان کے تین روزہ دورے پر ہیں۔قبل ازیں وفاقی وزیر کی آمد پر کمشنر گلگت اور ڈی سی غذر نے وفاقی وزیر کا استقبال کیا۔
