اسلام آباد۔12مارچ (اے پی پی):انسٹی ٹیوٹ آف اسٹریٹجک اسٹڈیز اسلام آباد (آئی ایس ایس آئی) میں چائنا پاکستان اسٹڈی سینٹر (سی پی ایس سی) نے چائنا میڈیا گروپ کے تعاون سے بدھ کو سیمینار کا انعقاد کیا جس کا عنوان ”چائنا ان سپرنگ چائنا آپر چونیٹی شیئرڈ بائی دا ورلڈ“ تھا۔ ڈی جی آئی ایس ایس آئی سہیل محمود نے چین کے سفیر جیانگ زیڈونگ کی موجودگی میں آئی ایس ایس آئی اور چائنا میڈیا گروپ کے اشتراک سے سیمینار میں معززین کا خیرمقدم کیا۔
انہوں نے وزیر خارجہ وانگ یی کی جانب سے عالمی استحکام کے لیے چین کے عزم کی توثیق کا ذکر کیا جس میں چین کے فعال کردار، جی ڈی آئی، جی سی آئی اور جی ایس آئی کے ذریعے عالمی کردار پر زور دیا گیا ہے۔ پاکستان اور چین کے اسٹریٹجک تعلقات کی مضبوطی پر زور دیتے ہوئے انہوں نے تجارت، روزگار کی تخلیق اور علاقائی روابط کو بڑھانے کے لیے سی پیک کے تبدیلی کے کردار اور نئے اقدامات کا بھی ذکر کیا ۔
سابق سفیر مسعود خان نے اپنے کلیدی خطاب میں پاک چین تعلقات کی پائیدار مضبوطی پر روشنی ڈالتے ہوئے ان کے تزویراتی، اقتصادی اور دفاعی تعاون پر زور دیا۔ انہوں نے کہا کہ سی پیک کے بنیادی ڈھانچے سے ہٹ کر لوگوں کے تبادلے اور سماجی ترقی کو شامل کرنے کی ضرورت ہے۔ انہوں نے چین کی بے مثال ترقی اور عالمی عروج اور بیلٹ اینڈ روڈ انیشیٹو کے ذریعے عالمی اقتصادی تعاون کو فروغ دینے میں اس کے کردار کو تسلیم کیا۔
انہوں نے دہشت گردی کے خلاف پاکستان کی جاری جنگ کا ذکر کیا اور چین کے ساتھ وسیع تر افہام و تفہیم اور تعاون پر زور دیا۔ تقریب کے مہمان خصوصی پاکستان میں چین کے سفیر جیانگ زیڈونگ نے چین پاکستان پائیدار دوستی کو اجاگر کرتے ہوئے باہمی احترام اور تعاون کو وسعت دینے پر زور دیا۔
انہوں نے کہا کہ چین نے اقتصادی ریزیلینس، ٹیک پر مبنی جدت کے لئے 3.6 ٹریلین ڈالر کی سرمایہ کاری اور سبز منصوبوں کو آگے بڑھایا ہے۔ انہوں نے چین کے سٹریٹجک اقدامات بالخصوص سی پیک اور خلائی تعاون کے ذریعے پاکستان کے کردار کی توثیق کی۔ انہوں نے کہا کہ غربت کے خاتمے، روزگار کی تخلیق اور ہنرمندی کی ترقی کے ساتھ ساتھ چین نے عالمی امن اور سلامتی کو فروغ دینے کے لیے اہم کردار ادا کیا ہے۔
انہوں نے چین اور پاکستان پر زور دیا کہ وہ جدید کاری، اقتصادی ترقی اور بین الاقوامی استحکام میں کلیدی شراکت داروں کے طور پر مل کر کام کریں۔ سفیر نغمانہ ہاشمی نے عوام پر مبنی ترقی، پائیداری اور پرامن ترقی، علاقائی اور عالمی تعاون کو مضبوط بنانے کے لیے چین کے عزم کو اجاگر کیا۔ ڈاکٹر منظور خان آفریدی نے چین کی تاریخی پیشرفت، مشترکہ عالمی ذمہ داری کے عزم، درجہ بندی، پرامن عالمی نظم کو فروغ دینے کے عزم کی تعریف کی۔
ڈاکٹر طاہر ممتاز اعوان نے اقتصادی ترقی اور بین الاقوامی تعاون میں اس کے کردار کو اجاگر کرتے ہوئے بیلٹ اینڈ روڈ انیشیٹو کے اندر علاقائی روابط، تجارت، اور بنیادی ڈھانچے کی ترقی کی اہمیت پر زور دیا۔اس سے قبل ڈائریکٹر چائنا پاکستان اسٹڈی سینٹر ڈاکٹر طلعت شبیر نے اپنے خطاب میں ملک کی معاشی اور گورننس پالیسیوں کی تشکیل میں چین کے کردار اور کے عالمی اثرات کا ذکر کیا۔ تقریب میں سفارت کاروں، سکالرز، پالیسی پریکٹیشنرز اور میڈیا کے نمائندوں نے شرکت کی۔
