انسٹی ٹیوٹ آف سٹریٹجک سٹڈیز میں "پاکستان کی خلائی پالیسی: خلائی صلاحیت کا استعمال” کے عنوان سے سیمینار کا انعقاد ، میجر جنرل (ر)عامر ندیم نے کلیدی خطاب کیا

اسلام آباد۔29فروری (اے پی پی):انسٹی ٹیوٹ آف سٹریٹجک سٹڈیز اسلام آباد(آئی ایس ایس آئی) میں آرمز کنٹرول اینڈ ڈس آرمامنٹ سینٹرنے جمعرات کو "پاکستان کی خلائی پالیسی: خلائی صلاحیت کا استعمال” کے عنوان سے ایک سیمینار کا انعقاد کیا۔یہاں جاری پریس ریلیز کے مطابق پاکستان سپیس اینڈ اپر ایٹموسفیئر ریسرچ کمیشن (سپارکو)کے سابق چیئرمین میجر جنرل(ر) عامر ندیم نے کلیدی خطاب کیا۔

انہوں نے اپنے خطاب میں بین الاقوامی تعاون کی اہمیت پر روشنی ڈالی اور خلائی مشنوں میں اخراجات اور وقت کو کم کرنے میں اس کے کردار پر زور دیا۔ انہوں نے دیگر ممالک کی مہارت اور وسائل سے فائدہ اٹھانے کے لیے تزویراتی شراکت داری کی وکالت کی جس سے پاکستان اپنی خلائی صلاحیتوں کو مزید موثر انداز میں آگے بڑھا سکتا ہے۔انہوں نے نیشنل سپیس پروگرام این ایس پی 2047 کا خاکہ پیش کیا۔

انہوں نے ملک کی فوری ضروریات اور صلاحیتوں سے ہم آہنگ ٹیکنالوجیز کو سخت ترجیح دینے کی ضرورت پر زور دیا۔ انہوں نے پاکستان کے خلائی پروگرام کے بارے میں امید کا اظہار کرتے ہوئے حکومت کی ثابت قدمی اور عزم کو پیشرفت کے کلیدی محرک قرار دیا۔ انہوں نے ریگولیٹری سیکٹر اور پبلک پرائیویٹ پارٹنرشپ پر زور دینے کی ضرورت کو اجاگر کیا۔ انہوں نے تجویز پیش کی کہ علاقائی پلیٹ فارمز میں شمولیت سے پاکستان کو اپنا خلائی پروگرام بہتر کرنے میں بھی مدد ملے گی۔

ڈی جی آئی ایس ایس آئی کے سفیر سہیل محمود نے اپنے خطاب میں پاکستان کی پہلی خلائی پالیسی کی اہمیت پر زور دیا اور کہا کہ ابھرتے ہوئے عالمی رجحانات کے مطابق خلائی شعبے کی مستقبل کی ترقی اور پاکستان کی اہم قومی ضروریات کو پورا کرنے کے لیے ایک جامع فریم ورک فراہم کیا ہے۔

انہوں نے پاکستان کے لیے سماجی و اقتصادی ترقی اور سلامتی کے لیے خلائی ٹیکنالوجی کی صلاحیتوں کو بروئے کار لانے کے لیے ضروری قرار دیا۔ انہوں نے قومی اہداف کو فروغ دینے کے لیے خلائی ٹیکنالوجیز اور ایپلی کیشنز کے موثر استعمال میں سہولت فراہم کرنے میں پالیسی کے کردار کو اجاگر کیا۔

قبل ازیں اے سی ڈی سی کے ڈائریکٹر ملک قاسم مصطفی نے اپنے تعارفی کلمات میں کہا کہ آج دنیا ایک نئے یا دوسرے خلائی دور میں داخل ہو چکی ہے اور بڑی طاقتیں خلائی دوڑ میں شامل ہیں، وہ دوہری استعمال کی صلاحیتوں کے ساتھ اپنے خلائی پروگراموں کو تیار کرنے اور جدید بنانے کے لیے بہت زیادہ وسائل لگا رہے ہیں۔

پاکستان ان پیش رفتوں سے بخوبی واقف ہے اور خلائی سائنس، ٹیکنالوجی اور پرامن مقاصد کے لیے اس کے استعمال اور ملک کی سماجی و اقتصادی ترقی کے شعبے میں تحقیق اور ترقی کے کام کو بہت اہمیت دیتا ہے۔ انہوں نے کہاکہ پاکستان کا نیشنل سپیس پروگرام "قومی مفاد اور خودمختاری کا تحفظ کرتے ہوئے پاکستان کے لوگوں کے معیار زندگی کو بہتر بنانے کے لیے خلائی سائنس اور ٹیکنالوجی سے استفادہ کرنے” کے وژن کے گرد گھومتا ہے۔

آئی ایس ایس آئی میں آرمز کنٹرول اینڈ ڈس آرمامنٹ سینٹر کی ریسرچ فیلو غزالہ یاسمین جلیل نے پاکستان کے خلائی پروگرام کا ایک جائزہ پیش کیا۔ ایسوسی ایٹ پروفیسر ایئر یونیورسٹی اسلام آبادڈ اکٹر علی سروش نے "پاکستان میں پائیدار ترقی کے لیے خلائی ٹیکنالوجی” کے بارے میں بات کرتے ہوئے پائیدار ترقی کو فروغ دینے میں خلائی ٹیکنالوجی کے اہم کردار پر زور دیا اورنیشنل سپیس پروگرام کے لیے اہم تحفظات کا خاکہ پیش کیا۔ انہوں نے این ایس پی کو ایجنڈا 2030 میں بیان کردہ ایس ڈی جیز کے ساتھ ہم آہنگ کرنے کی ضرورت پر زور دیا اور کہا کہ پالیسی کو تمام 17 ایس ڈی جیز اور ان کے حصول کے لیے ٹیکنالوجی کا فائدہ اٹھانا چاہیے۔

ڈین ایف اے ایس ایس ایئر یونیورسٹی اسلام آباد کے ڈاکٹر عادل سلطان نے پاکستان کے لیے اپنی خلائی پالیسی کو از سر نو تشکیل دینے سمیت پاکستان کے لیے تجارتی خلائی ٹیکنالوجی کو ترجیح دینے، سیٹلائٹ لانچ کرنے کے لیے غیر ملکی امداد پر انحصار کم کرنے اور مقامی صلاحیتوں کو فروغ دینے کی فوری ضرورت پر زور دیا۔

اپنے اختتامی کلمات میں چیئرمین آئی ایس ایس آئی سفیر خالد محمود نے کہا کہ سپیس ٹیکنالوجی ایک نئی سرحد ہے جو سماجی و اقتصادی ترقی کے لیے بہت ضروری ہے۔ انہوں نے خلا میں پاکستان کے سفر کی تعریف کی جس میں عزم، تخلیقی صلاحیت اور زمین کے ماحول سے باہر کی وسیع صلاحیتوں کو بروئے کار لانے کے لیے ثابت قدم عزم ہے۔

انہوں نے اس بات پر زور دیا کہ تحقیق اور ترقی، صلاحیت سازی، سائنسدانوں اور انجینئروں کی نئی نسل کی پرورش میں سرمایہ کاری خلائی تحقیق میں سب سے آگے رہنے کے لیے اہم عناصر ہیں۔سیمینار میں نامور ماہرین تعلیم، علاقے کے ماہرین، سائنسدانوں، تھنک ٹینک کے نمائندوں، پریکٹیشنرز اور سفارتی کور کے ارکان نے شرکت کی۔