لاہور۔14مئی (اے پی پی):انسپکٹر جنرل پولیس پنجاب ڈاکٹر عثمان انور سے گوجرانوالہ کے ڈی ایس پی عمران عباس چدھڑ نے سنٹرل پولیس آفس میں ملاقات کی۔اس موقع پر اے آئی جی ویلفیئر عبدالرحیم شیرازی اور پی ایس او ٹو آئی جی پنجاب ایس پی حمزہ امان اللہ بھی موجود تھے۔ڈاکٹر عثمان انور نے تھیلیسیمیا ہیموفیلیا میں مبتلا مریضوں کے لئے خون کے عطیات اکٹھے کرنے پر ڈی ایس پی عمران عباس کی خدمات کو سراہا اور کہا کہ ڈی ایس پی عمران عباس جیسے باہمت افسران پوری پولیس فورس کے لئے مشعل راہ ہیں۔
ڈی ایس پی عمران عباس نے بتایا کہ انھوں نے گزشتہ ساڑھے تین سال میں ہزاروں کی تعداد میں خون کے عطیات اکٹھے کئے جبکہ ہر ماہ سینکڑوں کی تعداد میں خون کے عطیات اکٹھے کئے جا رہے ہیں،۔ پنجاب پولیس کے جوانوں سے اکٹھے کئے گئے خون کے عطیات مختلف آرگنائزیشنز کو دیئے جاتے ہیں۔ آئی جی نے مزید کہا کہ پنجاب پولیس کے ملازمین کے تھیلیسیمیا ہیموفیلیا سے متاثرہ بچوں کو سہ ماہی 45 ہزار روپے دیئے جا رہے ہیں اور رواں سال اب تک 70 لاکھ روپے سے زائد کے فنڈز دیئے گئے ہیں۔ ڈاکٹر عثمان انور نے کہا کہ گذشتہ سال02 کروڑ 73 لاکھ روپے سے زائد پولیس ملازمین کے تھیلیسیمیا سے متاثرہ بچوں پر خرچ کیے گئے۔
Short Link: https://urdu.app.com.pk/urdu/?p=597051
