لاہور۔31جنوری (اے پی پی):انسپکٹر جنرل پولیس پنجاب ڈاکٹر عثمان انور پولیس شہدا کے اہل خانہ کی بہترین ویلفیئر کیلئے سرگرم عمل ہیں۔ جس کے تسلسل میں فرض کی راہ میں جان قربان کرنے والے ایک اور پولیس جوان کی فیملی کو گھر دیا ہے۔
ترجمان پنجاب پولیس کے مطابق، شہید کانسٹیبل غضنفر محمود کے اہل خانہ کو شہید کوٹہ کے تحت ایک کروڑ 35 لاکھ روپے مالیت کا گھر دیا گیا۔ شہید کے اہلخانہ کو انکی پسند کے مطابق شرقپور روڈ فیروز والہ شیخوپورہ میں گھر خرید کر فراہم کیا گیا۔ کانسٹیبل غضنفر محمود نے گذشتہ سال مارچ میں دوران ڈیوٹی جام شہادت نوش کیا۔
شہید کانسٹیبل غضنفر محمود کے لواحقین میں اہلیہ اور 04 بیٹے شامل ہے۔ آئی جی پنجاب کی خصوصی کاوش پر حکومت پنجاب نے شہید کے اہلخانہ کے گھر کیلئے فنڈز جاری کئے۔آئی جی پنجاب نے کانسٹیبل غضنفر محمود کی لازوال قربانی کو بھرپور خراج تحسین پیش کرتے ہوئے کہا کہ کانسٹیبل غضنفر محمود نے اپنی جان کی پرواہ کئے بغیر فرائض کی ادائیگی کے دوران جام شہادت نوش کیا۔
انہوں نے مزید کہا کہ پنجاب پولیس اپنے بہادر شہدا کی قربانیوں کو کبھی فراموش نہیں کرے گی اور پنجاب پولیس کانسٹیبل غضنفر محمود جیسے 1650 سے زائد بہادر شہدا کی امین فورس ہے۔
Short Link: https://urdu.app.com.pk/urdu/?p=554586
