لاہور۔12فروری (اے پی پی):انٹر نیشنل ہارس اینڈ کیٹل شو 2025 رنگا رنگ انٹرنیشنل ٹینٹ پیگنگ کا تیسرا اور آخری دِن سنگل لائن، ڈبل، ٹرپل اور چار شاہ سواروں کے فائنل مقابلوں ساتھ اختتام پذیر ہوگیا۔تین روزہ انٹرنیشنل ٹینٹ پیکنگ فرینڈشپ ٹورنامنٹ کاانعقاد بینین ٹری پولو گرائونڈ کینٹ لاہور میں منعقد ہوا جس میں سائوتھ افریقہ ، سعودی عرب، مصر، روس، قطر،کویت،امریکہ، ناروے اور پاکستان کی ٹیموں نے حصہ لیا۔ تیسرے دن کے فائنل نتائج میں پاکستان نے پہلی، مصر نے دوسری، سعودی عرب نے تیسری اور سائوتھ افریقہ نے چوتھی پوزیشن حاصل کی۔
ترجمان پی ایچ اے کے مطابق 9انٹرنیشنل ٹیموں اور36انٹر نیشنل کھلاڑیوں نے انٹرنیشنل ٹینٹ پیگنگ فرینڈشپ ٹورنامنٹ میں حصہ لیا۔تیر اندازی کے مقابلوں میں پاکستان، روس، ترکیہ ، ایران اورقازقستان کے 16تیر انداز کھلاڑیوں نے حصہ لیا۔تیر اندازی کے مقابلے میں کازقستان کی ٹیم نے پہلی ، ترکیہ کی دوسری اور ایران نے تیسری پوزیشن حاصل کی۔ نیزہ بازی کی 9 اور تیراندازی کی 5بین الاقوامی ٹیمیں مقابلوں میں شامل رہیں۔شاہ سواروں نے گھڑ سواری اور نیزہ بازی کی کمال مہارت کا مظاہرہ کیا جیسے شائقین کی جانب سے خو ب سراہا اورپسند کیاگیا۔
جیتنے والی ٹیموں کے گھڑ سواروں اور تیر اندازوں میں ٹرافیاں اور میڈلز تقسیم کیے گئے جبکہ فورٹریس اسٹیڈیم میں نیشنل ٹینٹ پیگنگ کے مقابلوں میں پہلے دن 60ٹیمیں 260گھڑ سواروں کا مقابلے سنگل لائن مقابلوں میں حصہ لیا۔ دوسرے روز لائن فور مقابلے کا انعقاد کیا گیا۔پہلے روز سنگل مقابلوں میں مہر عمران حیدر بربانہ، وٹوکلب، دوسری پوزیشن رائے آصف بھولا کھرل، ایس اے گارڈن، تیسری پوزیشن ملک علی حسن وٹو، ذیلدار کلب اور چوتھی پوزیشن کہاوڑ ٹینٹ پیگنگ کلب نے حاصل کی۔
دوسرے روز کے سنگل لائن نیزہ بازی مقابلوں میں پہلی پوزیشن مہر اسرار احمد نرگانہ، دوسری پوزیشن علی بابر الپا اور تیسری پوزیشن رائے آفتاب مانیکا، چوہدری چن محمود راندوانہ نے حاصل کی۔ تیسرے روز سیشن آف فور کے مقابلوں میں پہلی پوزیشن چوہدری سنی خان رانجھا کھرل کلب چھوکر کلاں،دوسری پوزیشن چوہدری منور عباس کھوکھر شو لائن کلب لاہور،تیسری پوزیشن چوہدری جواد ارشد بٹ،الحفیظ ملک جہلم کلب نے حاصل کی۔نیشنل ٹینٹ پیگنگ مقابلوں میں حصہ لینے والی ٹیموں میں ایک کروڑ سے زائد مالیت انعامات اور کیش پرائز تقسیم کیے گئے ۔
پہلی پوزیشن حاصل کرنے والی ٹیم کو پانچ لاکھ، دوسری پوزیشن حاصل کرنے والی ٹیم میں دو لاکھ روپے اور تیسری پوزیشن حاصل کرنے ٹیم میں 2 لاکھ روپے اور ٹرافیاں، شیلڈز اور کیش پرائزز دیئے گئے۔ فورٹریس اسٹیڈیم میں تقسیم انعامات کے وقت مہمان خصوصی وزیر ہائوسنگ اینڈ اربن ڈویلپمنٹ پنجاب بلال یاسین، چیئرمین پی ایچ اے غزالی سلیم بٹ نے ونر ٹیموں میں انعامات تقسم کیے اور کھلاڑیوں کے جذبے کو سراہا۔
Short Link: https://urdu.app.com.pk/urdu/?p=560025
