دبئی۔23مئی (اے پی پی):انگلینڈ اور آسٹریلیا کی کرکٹ ٹیموں کے درمیان ایشز سیریز کے 74 ویں ایڈیشن کا آغاز رواں سال نومبر میں آسٹریلیا میں ہوگا۔ پانچ ٹیسٹ میچوں پر مشتمل سیریز کا پہلا میچ انگلینڈ اور آسٹریلیا کی ٹیموں کے درمیان 21 نومبر سے پرتھ سٹیڈیم پرتھ میں شروع ہوگا ۔پرتھ سٹیڈیم (جسے آپٹس سٹیڈیم بھی کہا جاتا ہے) ایشزسیریز کے پہلے ٹیسٹ کی میزبانی کرے گا۔ یہ پہلا موقع ہوگا جب پرتھ سٹیڈیم ایشز ٹیسٹ کی میزبانی کرے گا اور پرتھ میں ایشز کرکٹ کی واپسی کا نشان بھی ہوگا۔انٹرنیشنل کرکٹ کونسل (آئی سی سی )نے مینز ایشز سیریز کے شیڈول اور وینیوز کا اعلان کر دیا ہے ۔
آسٹریلیا اور انگلینڈ کے مابین ایشز سیریز 2025/26کا آغاز 21نومبر سے آسٹریلیا میں ہوگا۔ سیریز کا پہلا ٹیسٹ میچ 21 سے 25 نومبر تک پرتھ سٹیڈیم پرتھ میں کھیلا جائے گا۔ دونوں ٹیموں کے درمیان پانچ ٹیسٹ میچز کھیلے جائیں گے۔مینز ایشز سیریز کے شیڈول کے مطابق پانچ ٹیسٹ میچوں کی سیریز کا دوسرا ٹیسٹ 4سے 8دسمبرگابا، برسبین میں کھیلا جائےگا،تیسرا میچ 17 سے 21دسمبرتک ایڈیلیڈ اوول، ایڈیلیڈمیں کھیلا جائے گا،چوتھا باکسنگ ڈے ٹیسٹ میچ 26 سے 30 دسمبر تک میلبورن کرکٹ گرائونڈ، میلبورن(ایم سی جی)میں کھیلا جائے گا جبکہ پانچواں اور آخری ٹیسٹ میچ 4سے 8 جنوری 2026 تک سڈنی کرکٹ گرائونڈ، سڈنی میں کھیلا جائے گا۔
1982/83 کی ایشزسیریز کے بعد یہ آسٹریلیا میں برسبین کرکٹ گراؤنڈ میں شروع ہونے والی پہلی ایشز سیریز بھی ہو گی۔ دونوں ٹیموں کے درمیان 73 ایشز سیریز ہوچکی ہیں جن میں سے 34 میں آسٹریلیا نے فتح حاصل کی جبکہ 32 سیریز انگلینڈ کے نام رہیں ۔7 ایشز سیریز بے نتیجہ رہیں۔یہ سیریز مجموعی طور پر 74ویں ایشز سیریز جو آسٹریلیا میں ہوگی۔دونوں ٹیموں کے درمیان گزشتہ ایشز سیریز میں 2-2 سے برابر ہوگئی تھی۔واضح رہے کہ 2025/26 کی ایشز سیریز ورلڈ ٹیسٹ چیمپئن شپ کا حصہ ہوگی ۔
Short Link: https://urdu.app.com.pk/urdu/?p=600601
