لندن۔4اگست (اے پی پی):بھارت نے 5 ٹیسٹ میچوں کی سیریز کے اوول، لندن میں کھیلے گئے پانچویں اور آخری ٹیسٹ میں سنسنی خیز مقابلے کے بعد میزبان انگلینڈ کی ٹیم کو 6 رنز سے شکست دے کر پانچ میچوں کی سیریز 2-2سے برابر کر دی۔ اوول ٹیسٹ میچ کے پانچویں اور آخری روز انگلینڈ کو جیت کیلئے 35 رنز جبکہ بھارت کو چار وکٹیں درکار تھیں۔
بھارت کے محمد سراج نےشاندار بائولنگ کا مظاہرہ کرتے ہوئے میچ کا پانسہ پلٹ دیا اور انگلینڈ کا سیریز جیتنے کا خواب چکناچور کردیا۔ میچ کی دوسری اننگز میں محمد سراج نے عمدہ بائولنگ کا مظاہرہ کرتے ہوئے 5 جبکہ پراسدھ کرشنا نے 4 کھلاڑیوں کو آئوٹ کرتے ہوئے اپنی ٹیم کی فتح میں اہم کردار ادا کیا۔ بھارت کے فاسٹ بائولر محمد سراج کو عمدہ بائولنگ پر میچ کا بہترین کھلاڑی قرار دیا گیا جبکہ انگلینڈ کے مایہ ناز بلے باز ہیری بروک سیریز کے بہترین کھلاڑی قرار پائے۔پیر کو میچ کے پانچویں اور آخری روز انگلینڈ نے اپنی دوسری ادھوری اننگز 339 رنز 6 کھلاڑی آئوٹ پر دوبارہ شروع کی تو جیمی سمتھ 2رنز پر کھیل رہے تھے ،جیمی سمتھ اپنے گزشتہ روز کے سکور میں کوئی اضافہ کئے بغیر محمد سراج کی گیند پر وکٹ کیپر دھرو جورل کے ہاتھوں کیچ آئوٹ ہوگئے۔
جیمی اورٹن انگلینڈ کے آٹھویں آئوٹ ہونے والے کھلاڑی تھے جو 9 رنز بناکر محمد سراج کی گیند پر ایل بی ڈبلیو آئوٹ ہوگئے۔جوش ٹنگ نویں آئوٹ ہونے والے کھلاڑی تھے جو کوئی رن بنائے بغیر پویلین لوٹ گئے۔ان کو پراسدھ کرشنا نے کلین بولڈ کر دیا۔گس اٹکنسن انگلینڈ کے آخری آئوٹ ہونے والے کھلاڑی تھے جو 17 رنز بناکر محمد سراج کی گیند پر کلین بولڈ ہوگئے ۔
کرس ووکس بغیر کوئی رن بنائے ناٹ آئوٹ رہے۔ یوں بھارت نے سنسنی خیز مقابلے کے بعد پانچویں ٹیسٹ میچ میں انگلینڈ کو نہ صرف 6 رنز سے شکست دے دی بلکہ پانچ میچوں کی سیریز کا اختتام بھی 2-2 کی برابری پر کیا۔ بھارت کی جانب سے شاندار بائولنگ کا مظاہرہ کرتے ہوئے محمد سراج نے پانچ اور پراسدھ کرشنا نے چار کھلاڑیوں کو پویلین کی راہ دکھائی۔
آکاش دیپ نے ایک کھلاڑی کو آئوٹ کیا۔ بھارت کے فاسٹ بائولر محمد سراج کو عمدہ بائولنگ پر میچ کا بہترین کھلاڑی قرار دیا گیا جبکہ انگلینڈ کے مایہ ناز بلے باز ہیری بروک سیریز کا بہترین کھلاڑی قرار پائے۔
