اسلام آباد۔22نومبر (اے پی پی):وزیر اعظم کامیاب جوان پروگرام کے چیئرمین رانا مشہود احمد خان نے کہا ہے کہ علامہ اقبال اوپن یونیورسٹی سے چلنے والا بچوں کی کردار سازی کا مربوط اور پُر عزم کارواں پورے پاکستان کی آواز بنے گا
۔ جمعہ کو علامہ اقبال اوپن یونیورسٹی میں ’’ آرٹ آف پرنٹنگ ‘‘ورکشاپ کی اختتامی تقریب سے خصوصی خطاب کرتے ہوئے انہوں نے کہا کہ ترقی اُن اقوام کا مقدر بنتی ہے جن کے نوجوانوں میں آگے بڑھنے کی لگن اور تڑپ ہوتی ہے۔
پاکستان کے روشن مستقبل کے لئے بچوں کونیک، صالح اور کامیاب انسان بنانے کی اس کوشش پر رانا مشہود نے علامہ اقبال ا وپن یونیورسٹی کے وائس چانسلر، پروفیسر ڈاکٹر ناصر محمود کو مبارکباد ددی۔
انہوں نے مزید کہا کہ اس ورکشاپ کے ماسٹر ٹرینرز میں انہیں وہ پاکستان نظر آرہا ہے جس کے لئے قائد اعظم محمد علی جناح نے جدوجہد کی، جس کا خواب علامہ محمد اقبال نے دیکھا اورجس کے لئے ہمارے بزرگوں نے قربانیاں دی تھیں۔
وزارت منصوبہ بندی و ترقی کی پارلیمانی سیکرٹری، وجیہہ اکرم نے بطور مہمان اعزاز تقریب سے خطاب کیا۔ انہوں نے کہا کہ ترقی دولت سے نہیں، بچوں کو اچھا شہری بنانے سے ملتی ہے۔ وجیہہ اکرم نے کہا کہ قوم کی تعمیر کی اس جدوجہد میں وہ علامہ اقبال اوپن یونیورسٹی اور دیگر پارٹنر آرگنائزیشنز کے شانہ بشانہ کھڑی رہیں گی۔
تقریب کے دوران علامہ اقبال اوپن یونیورسٹی اورر نیشنل کاؤنٹر ٹیرراازم اتھارٹی(نیکٹا)کے مابین ملک میں فروغ امن کے لئے مشترکہ کوششوں کے حوالے سے معاہدے پر دستخطوں کی تقریب بھی منعقد ہوئی۔معاہدے پر یونیورسٹی کی جانب سے شعبہ بین الاقوامی امور کے ڈائریکٹر، ڈاکٹر زاہد مجید نے دستخط کئے جبکہ دوسری طرف سے نیکٹا کے ڈائریکٹر جنرل، ڈاکٹر خالد چوہان نے دستخط کئے۔تقریب سے خطاب کرتے ہوئے ڈاکٹر خالد چوہان نے کہا کہ ہیومن ڈیولپمنٹ پر ہماری خصوصی توجہ ہے۔
انہوں نے کہا کہ نئی نسل میں انتہا پسندانہ نظریات اور سوچ کے خلاف آگہی پھیلانا اور اس کی روک تھام کرنے میں گلوبلائزیشن اور سوشل میڈیا جیسے دیگر چیلنجز کا سامنا ہے۔اوپن یونیورسٹی کی فیکلٹی آف سائنس کے سینئر پروفیسر ڈاکٹر ارشاد احمد ارشد نے کہا کہ اوپن یونیورسٹی تعلیمی منظر نامے کو آگے بڑھانے کے کام میں ہمیشہ فرنٹ فٹ پر رہتی ہے۔
انہوں نے کہا کہ اس ورکشاپ میں ماسٹر ٹرینرز کو بچوں کی تربیت کی ضروری مہارتیں سکھادی گئی ہیں۔ڈاکٹر محمد اطہر حسین نے کہا کہ اس ورکشاپ کے ٹوٹل 24سیشنز تھے، ہر روز 6،6سیشن منعقد ہوئے جس میں 75ماسٹر ٹرینرز کو تربیت فراہم کی گئی جو کمیونٹی میں جاکر ہم آہنگی، اخوت، پیار محبت کو فروغ دیں گے۔تقریب کے اختتام پرورکشاپ کے ماسٹر ٹرینرز میں اسناد تقسیم کی گئیں۔
Short Link: https://urdu.app.com.pk/urdu/?p=528066
