لاہور۔9جولائی (اے پی پی):آئل اینڈ گیس ریگولیٹری اتھارٹی (اوگرا) نے ڈیجیٹل تبدیلی کی جانب اپنے سفر کو جاری رکھتے ہوئے پاکستان کی آئل سپلائی چین کو ڈیجیٹل بنانے کے فلیگ شپ منصوبے کے دوسرے مرحلے کا آغاز کر دیا ہے۔ ترجمان اوگرا کے مطابق یہ جامع ٹریک اینڈ ٹریس سسٹم پنجاب انفارمیشن ٹیکنالوجی بورڈ (پی آئی ٹی بی) کے تعاون سے متعارف کروایا گیا ہے ۔
اس منصوبے کے تحت پٹرولیم مصنوعات کی ترسیل کے مکمل نظام کو ڈیجیٹل بنایا جا رہا ہے، جس میں ریفائنریوں اور درآمدی ٹرمینلز سے لے کر اسٹوریج ڈپوز، آئل ٹینکرز اور ریٹیل آئوٹ لیٹس تک تمام مراحل شامل ہیں۔نئے نظام میں ای آر پی پلیٹ فارمز، جی پی ایس ٹریکنگ اور مرکزی ڈیش بورڈز کا استعمال کیا جائے گا تاکہ ایندھن کی ترسیل کی بروقت نگرانی ممکن ہو اور غیر قانونی ڈیکینٹنگ واسمگلنگ کی موثر طریقے سے روک تھام کی جا سکے ۔
ترجمان نے بتایا کہ اس وقت ملک کی 29 سے زائد آئل مارکیٹنگ کمپنیاں (او ایم سیز) ای آر پی سسٹمز پر کام کر رہی ہیں اور تقریبا 15,000 آئل ٹینکرز پہلے ہی جی پی ایس ٹریکرز سے لیس کیے جا چکے ہیں۔ یہ پیش رفت اس نظام کے ملک گیر نفاذ کے لیے ایک مضبوط اور مستحکم بنیاد فراہم کرتی ہے۔
