لاہور۔17جنوری (اے پی پی):وزیراعلیٰ پنجاب سردار عثمان بزدار نے کہاہے کہ وزیراعظم عمران خان کی قیادت میں ترقی کے سفر میں کسی کو حائل نہیں ہونے دیں گے۔آج ایک طرف شفاف اور ایماندار قیادت ہے اور دوسری طرف عبرت کی تصویر بنے سابق حکمران۔بد قسمتی سے پی ڈی ایم نے قومی مفادات کو بالائے طاق رکھا ہواہے۔عوام نے کرپشن کو نہیں بلکہ شفافیت کو ووٹ دے کر منتخب کیاہے۔حکومت کو اپوزیشن سے کوئی خطرہ نہیں اوریہ غیر فطری اتحاد وقت کے ساتھ ختم ہورہاہے اورووٹ کو عزت دو کا کھوکھلا نعرہ اپنی موت آپ مرچکا ہے۔وزیراعلیٰ عثمان بزدار نے ایک بیان میں کہاکہ حکومت اپنی آئینی مدت پوری کرے گی اورترقی کے سفر میں روڑے اٹکانے والوں کو کچھ حاصل نہیں ہوگا۔ مایوس اپوزیشن نے ہر قومی مسئلے پر عوام کو مایوس کیا ہے۔اپوزیشن نے اپنی تمام توانائی صرف زبانی جمع خرچ پر صرف کی۔ 22 کروڑ عوام اپوزیشن عناصر کے دوغلے چہرو ¿ں سے بخوبی آگاہ ہیں۔اپوزیشن کو یہ بات ذہن نشین کر لینی چاہیے کہ بیان بازی سے عوام کی خدمت نہیں ہوتی۔انہوں نے کہاکہ عوام کی خدمت کیلئے ان کے ساتھ کھڑا ہونا پڑتا ہے۔ تحریک انصاف کی قیادت عوام کے ساتھ کندھے سے کندھا ملا کر کھڑی ہے۔ہم کل بھی عوام کے ساتھ تھے، آج بھی ساتھ ہیں، آئندہ بھی ساتھ رہیں گے۔پی ڈی ایم کی سیاست چمکانے کی کوشش پہلے بھی ناکام رہی اور آئندہ بھی ناکام رہے گی۔ اپوزیشن جماعتوں کا منفی رویہ تاریخ کا حصہ بن چکا ہے اوراپوزیشن کی عوام میں رہی سہی ساکھ مکمل طور پر ختم ہو چکی ہے۔انہوں نے کہاکہ اپوزیشن نے ذاتی مفادات کی خاطر قومی یکجہتی کو تباہ کرنے کی مذموم کوشش کی۔ذاتی مفادات کی خاطر اکٹھی ہونے والی اپوزیشن نے قومی مفادات کو زک پہنچائی۔عملی طور پر اپوزیشن کی پوزیشن صفر رہی۔اپوزیشن واویلا مچاتی رہی اور عوام کیلئے کچھ نہیں کیا۔عوام دوچہروں والے ان سیاست دانوں کی منفی سیاست سے متنفر ہو چکے ہیں۔تحریک انصاف کی قیادت غریب عوام کا درد سمجھتی ہے۔ یہ وقت پوائنٹ سکورنگ کا نہیں۔اپوزیشن کی جانب سے ملک میں عدم استحکام پیدا کرنے کی گھٹیا سیاست نہیں چلے گی۔ عوام کے سامنے بلند و بانگ دعویٰ کرنے والوں کی قلعی کھل چکی ہے۔اپوزیشن جماعتوں نے غیر معمولی حالات میں بھی غیر ذمہ داری کا ثبوت دیا ہے۔وقت نے ثابت کیا ہے کہ وزیراعظم عمران خان کی قیادت میں حکومت نے بروقت فیصلے کئے۔
