اسلام آباد۔7جون (اے پی پی):ڈاکٹر اکبر نیازی ٹیچنگ ہسپتال نےاسلام آباد میں بون میرو ٹرانسپلانٹ کے حوالے سے آگاہی سیمینار منعقد کیا۔سیمینار میں اس شعبے میں ہونے والی تازہ ترین پیشرفت پر بات چیت کی گئی جس میں پاکستان جیسے ترقی پذیر ممالک کو بون میرو ٹرانسپلانٹ مراکز کی منظوری کے حصول میں درپیش چیلنجز پر توجہ دی گئی۔ سیمینار کا مقصد ڈاکٹروں، نرسوں اور شعبہ صحت سے وابستہ انتظامیہ کو اس شعبے میں جدید تکنیکس اور علاج بارے آگاہ کرنا تھا۔
ڈاکٹر لارنس فالکنر، اٹلی سے پیڈیاٹرک ہیماٹولوجی سے منسلک آنکولوجسٹ اور سٹیم سیل ٹرانسپلانٹ سپیشلسٹ اور اکبر نیازی ہسپتال میں بی ایم ٹی یونٹ کے کنسلٹنٹ، امریکاکے سینٹ جوڈ چلڈرن ریسرچ ہسپتال کے بون میرو ٹرانسپلانٹ اینڈ سیلیولر تھراپی ڈیپارٹمنٹ سے علی سلیمان، سپین سے آنکولوجی اور ٹرانسپلانٹس یونٹ، ہسپتال یونیورسیٹاریو و پولی ٹیکنک ایسوسی ایٹ پروفیسر، والنسیا یونیورسٹی، فیکلٹی آف نرسنگ اینڈ پوڈیاٹری یوجینیا ٹریگوسو ارجونا؛ اور میجر جنرل (ر) پرویز احمد، بی ایم ٹی شعبہ کے ماہرنے معلوماتی لیکچرز دیئے اور "بون میرو ٹرانسپلانٹ سینٹرز کی ایکریڈیٹیشن – ترقی پذیر ممالک میں چیلنجز” کے عنوان سے سیمینار سے خطاب کیا ۔
سیمینار میں مختلف اداروں کے معروف پروفیسرز، سرجنز، فزیشنز، نرسز اور میڈیکل سٹوڈنٹس کی بڑی تعداد نےشرکت کی۔ شرکا نے سیمینار کے انعقاد کو سراہا۔ اے این ٹی ایچ اور اسلام آباد میڈیکل اینڈ ڈینٹل کالج کی انتظامیہ بشمول چیئرمین ڈاکٹر غلام اکبر نیازی، منیجنگ ڈائریکٹر یاسر خان نیازی اور ڈائریکٹر ہسپتال ڈاکٹر عریج نیازی نے بھی تقریب میں شرکت کی۔
یاسر خان نیازی نے معزز مہمان مقررین اور تمام شرکاکا شکریہ ادا کیا۔ انہوں نے کہا کہ ہمیں یہ اعلان کرتے ہوئے فخر محسوس ہو رہا ہے کہ ہم 2025 تک بی ایم ٹی کی جے سی آئی ایکریڈیٹیشن حاصل کرنے والا پہلا ہسپتال بننے کی کوشش کریں گے۔پاکستان میں بون میرو سمیت مختلف بیماریوں میں اضافہ کے پیش نظرہسپتال مستقبل میں بھی طبی صلاحیتوں کو بڑھانے کے لیے موثر اقدامات کرنے کے لیے پرعزم ہے۔
Short Link: https://urdu.app.com.pk/urdu/?p=367484
