اسلام آباد۔11اگست (اے پی پی):صدرِ مملکت آصف علی زرداری نے کہا ہے کہ آج اقلیتوں کے حقوق کے تحفظ اور قومی ہم آہنگی کے عزم کی تجدید کا دن ہے، یہ دن قائداعظم کے اس وژن کی یاد دہانی کراتا ہے جس میں ہر شہری کو برابری اور باہمی احترام کا حق حاصل ہے۔ اقلیتوں کے دن کے موقع پر خصوصی پیغام میں صدرِ مملکت نے کہا کہ ہم اقلیتی برادریوں کی خدمات کو خراجِ تحسین پیش کرتے ہیں، اقلیتوں نے مسلح افواج، عدلیہ، سول سروسز، تعلیم اور صحت کے شعبوں میں شاندار خدمات انجام دی ہیں، ا ن کی حب الوطنی اور خدمات پوری قوم کے لیے باعثِ فخر ہیں۔
انہوں نے کہا کہ آئینِ پاکستان تمام شہریوں کو بلا تفریق مساوی حقوق کا ضامن اور ان کے سیاسی، معاشی، مذہبی، سماجی اور ثقافتی حقوق کا مکمل تحفظ کرتا ہے۔ صدرِمملکت نے کہا کہ حکومت نے اقلیتوں کی فلاح و بہبود اور بااختیار بنانے کے لیے عملی اقدامات کیے ہیں ، اقلیتی طلبہ کو وظائف اور مالی معاونت فراہم کی جا رہی ہے۔
صدر مملکت نے 2009 میں اپنی پہلی مدتِ صدارت کے دوران 11 اگست کو اقلیتوں کا دن قرار دیا تھا۔ انہوں نے کہا کہ بین المذاہب مکالمے کو فروغ اور قومی زندگی میں اقلیتوں کی بامعنی شرکت کو یقینی بنائیں گے۔ صدرِ مملکت نے کہا کہ اقلیتوں کو بااختیار بنانے، ان کی ترقی اور فلاح کے لیے کام جاری رکھیں گے۔ان کا کہنا تھا کہ بھائی چارے، ہم آہنگی اور یکجہتی کے ذریعے خوشحال پاکستان تشکیل دیں گے ۔ـ
