اسلام آباد۔2ستمبر (اے پی پی):نیشنل ڈیزاسٹر مینجمنٹ اتھارٹی(این ڈی ایم اے )کے نیشنل ایمرجنسیز آپریشن سینٹر (این ای او سی) نے اگلے 12 تا 24 گھنٹوں میں پنجاب کے علاقوں بشمول سیالکوٹ، نارووال، لاہور، شیخوپورہ، گجرات، گوجرانوالہ، حافظ آباد، چنیوٹ، فیصل آباد، سرگودھا اور ملحقہ علاقوں میں وسیع پیمانے پر تیز بارشوں کا الرٹ جاری کر دیا ہے۔
منگل کو این ڈی ایم اے کے میڈیا ونگ سے جاری کردہ بیان کے مطابق اسلام آباد، راولپنڈی، جہلم، چکوال، اٹک اور ملتان، خانیوال، بہاولنگر، بہاولپور، رحیم یار خان، ڈی جی خان، راجن پور اور ملحقہ علاقوں میں اگلے 12 سے 24 گھنٹوں میں وقفے وقفے سے بارش کا امکان ہے۔یہ بارشیں پنجاب میں سیلاب زدہ علاقوں میں مسائل بڑھا سکتی ہیں۔دریائوں، ندیوں اور نالوں سے دور رہیں، غیر ضروری سفر سے گریز کریں، حفاظتی اقدامات یقینی بنائیں، انتظامیہ کی ہدایات پر عمل کریں، بجلی کے تاروں اور پانی جمع ہونے والے علاقوں سے دور رہیں۔
