ایبٹ آباد۔ 11 اگست (اے پی پی):معرکہ حق جشن آزادی ایبٹ آباد کے بوائز سکولز کی پروقار رنگا رنگ افتتاحی تقریب ہائی سکول نمبر تین میں منعقد کی گئی۔تقریب کے مہمان خصوصی ڈپٹی کمشنر کیپٹن (ر) ثناء اللہ خان تھے۔تقریب میں ضلعی آفیسر محکمہ تعلیم مردانہ افتخار الغنی ،ڈپٹی ڈی ای او نصیر خان تنولی ،پرنسپل ہائی سکول نمبر تین ظفر ارباب عباسی ،پرنسپل ہائی سکول نمبر دو بختیار خٹک ،پرنسپل ہائی سکول نمبر ون طارق ثمر کے علاوہ واسا افسران ،
اساتذہ کرام اور طلباء بھی شریک تھے۔تقریب میں طلباء نے پی ٹی مارچ اور ڈرل کا مظاہرہ کرکے حاضرین سے داد وصول کی ۔طلباء نے جذبہ حب الوطنی سے لبریز تقاریر ،ملی نغمے اور ثقافتی مائیے بھی پیش کئے ۔مختلف سکولز کےطلباء کا کوئز مقابلہ بھی کروایا گیا۔اس موقع پر ڈپٹی کمشنر ایبٹ آباد کیپٹن (ر) ثناء اللہ خان نے کہا کہ ملک بھر کی طرح ایبٹ آباد میں آپریشن بنیان مرصوص میں شاندار کامیابی اور بھارت کی شکست پر معرکہ حق جشن آزادی کو منانے کے لئے تقریبات جاری ہیں ۔ہمارا ازلی دشمن پاکستان کو نقصان پہنچانے کے لئے ہمیشہ تاک میں رہتا ہے۔لیکن پاک فوج ان کے عزائم کو خاک میں ملانے کے لئے ہمہ وقت تیار ہے۔انہوں نے اس بات پر زور دیا کہ طلباء اپنی ہم نصابی سرگرمیوں کے ساتھ تعلیم پر زیادہ سے زیادہ توجہ مرکوز کریں تاکہ مستقبل میں ملک اور قوم کی حقیقی معنوں میں خدمت کر سکیں۔
انہوں نے طلباء کی بہترین اور مثالی کارکردگی پر پچاس ہزار روپے انعام کا بھی اعلان کیا ۔قبل ازیں ضلعی ایجوکیشن آفیسر افتخار الغنی نے اپنے خطاب میں کہا کہ معرکہ حق جشن آزادی کی تقریبات 14 اگست تک جاری رہیں گی ۔ان تقریبات میں ملی نغموں ،تقاریر سمیت دیگر ہم نصابی سرگرمیوں کے مقابلوں کی آخری تقریب صوبائی سطح پر منعقد کی جائے گی ۔پرنسپل ہائی سکول نمبر تین ظفر ارباب عباسی نے میٹرک کے سالانہ شفاف امتحان میں سکول کے طلباء کی کارکردگی پر بریفنگ دی۔تقریب کے اختتام پر ایس آر ایس پی کے ریجنل منیجر زبیر انور کی جانب سے طلباء کو تعریفی اسناد اور مہمان خصوصی ڈپٹی کمشنر کو یادگاری شیلڈ بھی پیش کی گئی۔تقریب میں جشن آزادی کی مناسبت سے کیک بھی کاٹا گیا۔
