اسلام آباد۔5مئی (اے پی پی):سکیورٹیز اینڈ ایکسچینج کمیشن آف پاکستان (ایس ای سی پی) نے ریئل اسٹیٹ انویسٹمنٹ ٹرسٹ (REIT) مینجمنٹ کمپنیوں اور کمپنیز ایکٹ، 2017 کے سیکشن 42 کے تحت لائسنس یافتہ کمپنیوں کے لئے لائسنس حاصل کرنے کے لئے جانچ پڑتال کی فہرستیں جاری کی ہیں۔یہ اقدام ایس ای سی پی کی جانب سے ریگولیٹری وضاحت کو بڑھانے، کاروبار کرنے میں آسانی کو فروغ دینے اور ریگولیٹری عمل کی کارکردگی کو بہتر بنانے کی جاری کوششوں کا حصہ ہے۔ایس ای سی پی سے جاری پریس ریلیز کے مطابق REIT مینجمنٹ کمپنیوں کے لیے جانچ پڑتال کی فہرست اسپانسرز، پروموٹرز اور دیگر اسٹیک ہولڈرز کو Non-Banking Finance Companies (Establishment and Regulation) Rules, 2003 اور ریئل اسٹیٹ انویسٹمنٹ ٹرسٹ (REIT) ریگولیشنز، 2022 کے تحت طے شدہ طریقہ کار اور دستاویزی تقاضوں کو سمجھنے اور پورا کرنے میں مدد کرنے کے لیے بنائی گئی ہے۔
یہ نان بینکنگ فنانس کمپنی (این بی ایف سی) کے قیام کے لیے ایس ای سی پی کی اجازت حاصل کرنے اور REIT مینجمنٹ خدمات انجام دینے کے لیے لائسنس کے لیے درخواست دینے کے لیے پیشگی شرائط پر منظم رہنمائی فراہم کرتی ہے۔ یہ جانچ پڑتال کی فہرست ایس ای سی پی کی آفیشل ویب سائٹ www.secp.gov.pk/licensing/nbfcs/reit-management-services پر دستیاب ہے۔اسی طرح ایس ای سی پی نے سیکشن 42 (Association with Charitable and Not for Profit) کمپنیوں کے لیے ایک مخصوص تعمیلی جانچ پڑتال کی فہرست جاری کی ہے تاکہ غیر منافع بخش اداروں کو کمپنیز ایکٹ، 2017 کے تحت اپنی قانونی ذمہ داریوں کو پورا کرنے میں مدد مل سکے۔ یہ جانچ پڑتال کی فہرست لائسنسنگ، گورننس، مالیاتی رپورٹنگ اور انکشافات سے متعلق لازمی تقاضوں کا خاکہ پیش کرتی ہے جس سے درخواست دہندگان شروع سے ہی مکمل اور درست درخواستیں تیار کر سکیں گے۔
یہ دستاویز www.secp.gov.pk/licensing/section-42-companies پر دستیاب ہے۔ اگر درخواست یا خط و کتابت جمع کرانے کے پانچ کاروباری دنوں کے اندر کوئی جواب موصول نہیں ہوتا ہے تو درخواست دہندگان section42.licensing@secp.gov.pk پر ای میل کے ذریعے پیچھا کر سکتے ہیں۔ اہم ریگولیٹری اقدامات کو ایک واحد، قابل رسائی دستاویز میں یکجا کر کے، ان جانچ پڑتال کی فہرستوں سے توقع کی جاتی ہے کہ وہ پروسیسنگ کے اوقات کو نمایاں طور پر کم کریں گی، نامکمل یا ناقص درخواستوں کو کم سے کم کریں گی اور درخواست دہندگان اور ریگولیٹر دونوں کے لیے لائسنسنگ کے عمل کو ہموار کریں گی۔سٹیک ہولڈر کی سہولت کو مزید ادارہ جاتی بنانے کے لیے ایس ای سی پی نے تمام کمپنی رجسٹریشن دفاتر (سی آر اوز) میں شکایات کے اندراج اور حل کے لیے اضافی چینلز متعارف کرائے ہیں۔
Short Link: https://urdu.app.com.pk/urdu/?p=592888
