اسلام آباد۔25مئی (اے پی پی):سکیورٹیز اینڈ ایکسچینج کمیشن آف پاکستان (ایس ای سی پی) نے سرمایہ کاروں کی آگاہی اور شمولیت کو فروغ دینے کی کوششوں کو آگے بڑھانے کے لئے”سرمایہ کاری کے ذریعے دولت کی تعمیر” کے موضوع پر ایک انٹرایکٹو سیشن کا انعقاد کیا۔ ایس ای سی پی نے پاکستان اسٹاک ایکسچینج لمیٹڈ(پی ایس ایکس)، نیشنل کلیئرنگ کمپنی آف پاکستان لمیٹڈ (این سی سی پی ایل) اور سینٹرل ڈپازٹری کمپنی آف پاکستان لمیٹڈ (سی ڈی سی) کے تعاون سے اس ایونٹ کا انعقاد کیا۔ یہ سیشن گندھارا سٹیزن کلب، ایف نائن پارک، اسلام آباد میں منعقد ہونے والی دو روزہ ایکون فیسٹ اسلام آباد کی افتتاحی تقریب کا حصہ تھا۔
اجلاس کے پینلسٹس میں چیئرمین ایس ای سی پی عاکف سعید، پی ایس ایکس اور این سی سی پی ایل کے چیف ایگزیکٹو آفیسرز اور سی ڈی سی کے ایک سینئر نمائندے شامل تھے۔ پریس ریلیز میں مزید کہا گیا ہے کہ پینل کے شرکا نے مالیاتی خواندگی کو اپنانے اور طویل افق پر دولت جمع کرنے کے لئے دانشمندانہ سرمایہ کاری کرنے کی ضرورت پر زور دیا۔ انہوں نے سرمایہ کاری کے مختلف آلات کے بارے میں تفصیلی رہنمائی فراہم کی، اس کے علاوہ کیپٹل مارکیٹوں کے موثر اور شفاف کام کاج کے لئے ان کے متعلقہ اداروں کے کردار کو اجاگر کیا۔
انہوں نے مختلف قسم کی معلومات تک رسائی حاصل کرنے کے لئے اپنے متعلقہ اداروں کی ویب سائٹوں پر جانے کی بھی تجویز دی۔ سامعین ، جس میں مختلف شعبوں اور پس منظر سے تعلق رکھنے والے پیشہ ور افراد اور طلبا شامل تھے ، نے پینلسٹس کے ساتھ قریبی بات چیت کرکے ان کے تجربے اور مہارت سے فائدہ اٹھایا۔ خاص طور پر نوجوان سامعین نے سرمایہ کاری کے نئے مواقع تلاش کرنے کے لئے کیپٹل مارکیٹوں کی بڑھتی ہوئی ڈیجیٹلائزیشن سے فائدہ اٹھانے کے لئے اپنی گہری دلچسپی کا اظہار کیا۔
