اسلام آباد۔20اگست (اے پی پی):ایشین والی بال چیمپئن شپ میں پاکستان نے بنگلا دیش کو 0-3 سیٹس سے شکست دے کر فاتحانہ آغاز کیا ہے،بنگلادیشی ٹیم مسلسل دوسری شکست کے بعد ناک آؤٹ راؤنڈ کی دوڑ سے باہر ہوگئی۔
ایران کے شہر ارومیہ میں جاری ایشین والی بال چیمپئن شپ کے گروپ ایف میں کھیلے گئے میچ میں پاکستانی ٹیم نے شاندار کھیل پیش کرتے ہوئے بنگلہ دیش کو 3-0سیٹس سے ہرا کر کامیابی حاصل کی، پاکستان کی جیت کا سکور 16-25، 14-25 اور 21-25 رہا،میچ کے دوران ایک موقع پر پاکستان کو 3 کے مقابلے میں 12 پوائنٹس سے برتری حاصل ہوگئی تھی تاہم 9 پوائنٹس کے فرق پر پہلا سیٹ ختم ہوا۔
دوسرے سیٹ میں بھی پاکستان کا پلہ بھاری رہا لیکن ایک موقع پر بنگلا دیش کو 10-11 برتری ملی اور یہی پورے میچ کا واحد لمحہ تھا جب مخالف ٹیم کو پاکستان پر برتری حاصل ہوئی تاہم پاکستان نے مسلسل 8 پوائنٹس لے کر بنگلادیشی ٹیم پر ایک بار پھر سبقت حاصل کرلی اور انہیں دوبارہ میچ میں آنے کا موقع نہ دیا۔
تیسرے سیٹ میں بنگلا دیش نے پاکستان کو ٹف ٹائم دینے کی کوشش کی مگر وہ کسی بھی موقع پر پاکستان کے خلاف سبقت حاصل کرنے میں ناکام رہا یوں پاکستان نے 0-3 سے میچ اپنے نام کیا۔پاکستان کی اگلے راونڈ تک رسائی یقینی ہے،پاکستانی ٹیم اپنا دوسرا میچ کل پیر کو جنوبی کوریا کےخلاف کھیلے گی۔
