ایشین چیمپئن پاکستان آئی سی سی انڈر 19 مینز کرکٹ ورلڈ کپ میں عمدہ کارکردگی دکھانے کے لیے پرعزم

ہرارے۔14جنوری (اے پی پی):ایشین چیمپئن پاکستان آئی سی سی انڈر 19 مینز کرکٹ ورلڈ کپ میں عمدہ کارکردگی دکھانے کے لیے پرعزم ہے۔ انڈر 19 ورلڈ کپ ( کل) بروز جمعرات سے زمبابوے میں شروع ہو رہا ہے۔

پاکستان ٹیم کو گروپ سی میں شامل ہے جہاں اسے انگلینڈ، سکاٹ لینڈ اور زمبابوے کا چیلنج درپیش ہو گا۔ قومی ٹیم ورلڈ کپ اپنی مہم کا آغاز 16 جنوری کو ہرارے میں انگلینڈ کے خلاف میچ سے کرے گی۔ ٹیم کی قیادت کپتان فرحان یوسف کر رہے ہیں جنہوں نے ٹیم کی تیاریوں پر اطمینان کا اظہار کیا ہے۔

فرحان یوسف کا کہنا ہے کہ ملتان میں لگنے والے کیمپ نے ایشیا کپ اور ٹرائی سیریز میں ٹیم کی اچھی کارکردگی میں اہم کردار ادا کیا۔ انہوں نے کہا گزشتہ چھ ماہ سے سپورٹ اسٹاف کے ساتھ مسلسل محنت جاری ہے جس کے مثبت نتائج اب سامنے آنا شروع ہو گئے ہیں۔

فرحان یوسف نے کہا کہ آئی سی سی ایونٹ سے قبل ٹیم کی تیاری بھرپور رہی ہے اور کھلاڑیوں کے درمیان مضبوط ہم آہنگی پائی جاتی ہے جو بڑے ایونٹ میں بہتر نتائج کے لیے نہایت اہم ہے۔ انہوں نے کہا کہ ٹرائی سیریز اور امریکا کے خلاف کھیلے گئے وارم اپ میچز سے مقامی کنڈیشنز کو بہتر طور پر سمجھنے میں مدد ملی،جس سے ٹیم کو ورلڈ کپ کے میچز میں فائدہ ہو گا۔