لاہور۔2دسمبر (اے پی پی):ایف آئی اے لاہور،گوجرانوالا، فیصل آباد اور ملتان زون کا حوالہ ہنڈی اور غیر قانونی کرنسی ایکسچینج میں ملوث عناصر کے خلاف کریک ڈاؤن جاری ہے، ترجمان ایف آئی اے کی جانب سے ہفتہ کو جاری رپورٹ میں بتایا گیاکہ رواں سال کے دوران ملتان زون نے 41 چھاپہ مار کارروائیوں میں 41 مقدمات درج کرکے 53 ملزمان گرفتار کئے، چھاپوں کے دوران ملتان زون نے 201249 امریکی ڈالر، 2 کروڑ روپے سے زائد مالیت کی دیگر غیر ملکی کرنسی اور 1 ارب 92 کروڑ پاکستانی روپے برآمد کئے،گرفتار ملزمان بغیر لائسنس کرنسی کی ایکسچینج میں ملوث تھے۔
رواں سال کے دوران لاہور زون نے 38 چھاپہ مار کارروائیوں میں 36 مقدمات درج کر کے 79 ملزمان کو گرفتار کیا، چھاپوں کے دوران لاہور زون نے 126930 امریکی ڈالر، 6 کروڑ روپے سے زائد مالیت کی دیگر غیر ملکی کرنسی اور 76 کروڑ پاکستانی روپے برآمد کئے ، گوجرانوالہ زون نے 13 چھاپہ مار کارروائیوں میں 13 مقدمات درج کر کے 24 ملزمان کو گرفتار کیا،
چھاپوں کے دوران گوجرانوالہ زون نے 77086 امریکی ڈالر، 4 کروڑ 56 لاکھ روپے سے زائد مالیت کی دیگر غیر ملکی کرنسی اور 41 کروڑ پاکستانی روپے برآمد کئے ، فیصل آباد زون نے 42 چھاپہ مار کارروائیوں میں 67 ملزمان کو گرفتار کیا، چھاپوں کے دوران فیصل آباد زون نے 9479 امریکی ڈالر، 1 کروڑ 26 لاکھ روپے سے زائد مالیت کی دیگر غیر ملکی کرنسی اور 2 کروڑ 47 لاکھ پاکستانی روپے برآمد کئے،
ترجمان کا مزید کہنا ہے کہ ملزمان کی گرفتاری کے لئے قانون نافذ کرنے والے اداروں کی معاونت بھی حاصل کی گئی، ڈائریکٹر جنرل محسن حسن بٹ کی ہدایت کی روشنی میں ملزمان کی گرفتاری کے لئے تمام تر وسائل بروئے کار لائے جار ہے ہیں، غیر ملکی کرنسی کی سمگلنگ میں ملوث عناصر کے خلاف ٹھوس شواہد کی روشنی میں قرار واقعی سزائیں دلوائی جائیں گی، غیر قانونی کرنسی کی خریدوفروخت میں ملوث بین الاقوامی ایجنٹوں کے خلاف بھی گھیرا تنگ کیا جائیگا۔
Short Link: https://urdu.app.com.pk/urdu/?p=415828
