اسلام آباد۔18ستمبر (اے پی پی):ایف آئی اے کمرشل بینکنگ سرکل اسلام آباد نے بڑی کارروائی کرتے ہوئے غیرقانونی کرنسی کی خرید و فروخت میں ملوث پاپولر ایکسچینج ایچ اینڈ ایچ کمپنی شاندار چوک جہلم کے ملازمین کو گرفتار کر لیا۔ ترجمان ایف آئی اے کے مطابق پیر کو کمرشل بینکنگ سرکل کے انچارج ڈپٹی ڈائریکٹر جائِر نصرانی کی ہدایت پر 8رکنی ٹیم نے چھاپہ مار کارروائی کی۔
پاپولر ایکسچینج ایچ اینڈ ایچ کمپنی شاندار چوک جہلم سے 47 ملین مالیت کی ملکی اور غیر ملکی کرنسی برآمد کی۔برآمد ہونے والی کرنسی میں امریکی ڈالر برطانوی پاؤنڈ، ملائیشین رنگٹ ، ترکش لیرا، آسٹریلین ڈالر، یورو، قطری ریال سعودی ریال اور اماراتی درہم وغیرہ شامل ہیں ۔
برانچ سے بغیر ریکارڈ کے کیپٹل سے زیادہ کرنسی برآمد ہوئی جسے قبضہ میں لے لیا گیا۔ ملزمان کے خلاف کارروائی خفیہ اطلاع پر کی گئی، ملزمان کو گرفتار کرکے تفتیش کا آغاز کر دیا گیا ۔ کرنسی کی غیر قانونی خرید و فروخت اور حوالہ ہنڈی میں ملوث کمپنیوں کے خلاف سخت کارروائیاں جاری ہیں۔ ملزمان کی گرفتاری کے لئے تمام تر وسائل کو بروئے کار لایا جا رہا ہے۔
