اسلام آباد۔21اکتوبر (اے پی پی):ایف آئی اے گجرانوالہ اور گجرات سرکل کی ٹیم کی بڑی کارروائیاں، ڈائریکٹر گجرانوالہ زون ساجد اکرم کی ہدایت پر انسانی سمگلرز کے خلاف کریک ڈائون اورمختلف چھاپہ مار کارروائیوں میں ایک اشتہاری ملزم سمیت 4 انسانی سمگلرز کو گرفتار کر لیا۔
ترجمان ایف آئی اے کی طرف سے ہفتہ کو یہاں جاری بیان کے مطابق ملزمان میں محمد اشرف ، وقاص، محمد جمیل اور ہارون بشیر شامل ہیں۔ ملزم محمد اشرف اور وقاص کو علی پور چٹھہ ، ملزم محمد جمیل کو سیالکوٹ اور ملزم ہارون بشیر کو منڈی بہائوالدین سے گرفتار کیا گیا ہے۔ ملزم محمد اشرف اور وقاص بغیر لائسنس کے شہریوں کو بیرون ملک ملازمت کے لیے بھجوانے میں ملوث تھے۔
ملزمان کے قبضے سے6 عدد پاسپورٹ اور دیگر شواہد حاصل کر لئے گئے ہیں۔ ملزم محمد جمیل نے شہری کو بیرون ملک جرمنی ملازمت کا جھانسہ دے کر22 لاکھ روپے ہتھیائے جبکہ ملزم ہارون بشیر جعلی سفری دستاویزات بشمول مختلف ممالک کے پاسپورٹ بنانے میں ملوث پایا گیا۔ مذکورہ ملزمان کو گرفتار کر کے تفتیش کا آغاز کر دیا گیا ہے۔
Short Link: https://urdu.app.com.pk/urdu/?p=403895
