اسلام آباد۔27فروری (اے پی پی):فیڈریشن آف پاکستان چیمبرآف کامرس اینڈ انڈسٹری کے صدر عاطف اکرام شیخ نے کہا ہے کہ پاکستان کیلئے یورپی ممالک کے ساتھ تجارتی تعلقات کی بہتری ناگزیر ہے،پولینڈ کو پاکستان میں گرین اکانومی کے انیشیٹو میں سرمایہ کاری کرنی چاہئے،پولینڈ کی توانائی سے متعلق سیکٹر کی پاکستان میں سرمایہ کاری انتہائی خوش آئند ہے۔ ان خیالات کا اظہار انہوں نے جمعرات کو پاکستان میں پولینڈ کے سفیر ماچے پریسارسکی کے ایف پی سی سی آئی کے دورے کے موقع پر ان سے گفتگوکرتے ہوئے کیا۔
اس موقع پر پولش سفیر نے بزنس کمیونٹی سے ملاقات بھی کی جس میں پولینڈ اور پاکستان کے درمیان باہمی تجارتی تعلقات کو مزید مضبوط بنانے کا اعادہ کیا گیا۔پولش سفیر نے باہمی تجارتی تعلقات میں اضافے کیلئے بزنس کمیونٹی کو اپنے بھرپور تعاون کی یقین دہانی کرائی۔اس موقع پر گفتگوکرتے ہوئے ایف پی سی سی آئی کے صدر نے کہا کہ پاکستان کیلئے یورپی ممالک کے ساتھ تجارتی تعلقات کی بہتری ناگزیر ہے،پاکستان اور پولینڈ میں حالیہ عرصے میں تجارتی حجم میں اضافہ اطمینان بخش ہے۔
انہوں نے کہا کہ دونوں ممالک کو باہمی تجارت میں مزید اضافے کیلے اقدامات کرنے کی ضرورت ہے، جی ایس پی پلس اسٹیٹس نے پاکستان ٹیکسٹائل کو پولش مارکیٹ تک موثر رسائی فراہم کی ہے، پولینڈ کی توانائی سے متعلق سیکٹر کی پاکستان میں سرمایہ کاری انتہائی خوش آئند ہے،پولینڈ کو پاکستان میں گرین اکانومی کے انیشیٹو میں سرمایہ کاری کرنی چاہئے۔
پولینڈ کے سفیرماچے پریسارسکی نے کہا کہ انہیں ایف پی سی سی آئی کا دورہ کر کے دلی خوشی ہو رہی ہے،پاکستان کے ساتھ تجارتی تعلقات کو بہتر کرنا میرا مشن اور پہلی ترجیح ہے، ۔ انہوں نے کہا کہ پاکستان اور پولینڈ سیاسی ،سفارتی اور معاشی تعلقات کی تاریخ رکھتے ہیں، دونوں ممالک مضبوط کلچر اور وسیع تاریخی ورثے کے مالک ہیں،پاکستان اور پولینڈ کی بزنس کمیونٹی کے ایک دوسرے سے قریبی تعلقات ہیں۔
پولش سفیر نے کہا کہ پولینڈ جلد ہی یورپی یونین کی صدارت سنبھالے گا ،یہ دونوں ممالک کیلے ایک بڑا موقع ہو گا، پاکستان اور پولینڈ کو ایک دوسرے کے ممالک میں کاروبار کیلئے کسی تعارف کی ضرورت نہیں۔
Short Link: https://urdu.app.com.pk/urdu/?p=567013
