ریاض ، نیویارک ۔9مئی (اے پی پی):امریکا کی بڑی کمپنیوں کے سربراہان اور سرمایہ کار آئندہ ہفتے سعودی عرب کا دورہ کریں گے۔سبق ویب سائٹ کے مطابق دورہ کرنے والوں میں ایلون مسک، مارک زکربرگ، لیری فنک، سیم آلٹمین اور ہوائی جہاز بنانے والی کمپنی بوئنگ کے عہدیداران سمیت دیگر اہم شخصیات شامل ہیں۔امریکی سرمایہ کار سعودی تاجروں سے ملاقات کریں گے تاکہ مختلف شعبوں میں سرمایہ کاری کے مواقع پر تبادلہ خیال کیا جا سکے جن میں ہوائی جہاز اور گاڑیوں کی صنعت، ٹیکنالوجی، مصنوعی ذہانت، کرپٹو کرنسی، جنگی ساز و سامان اور مالیاتی شعبے شامل ہیں۔
سرمایہ کار دورے کے دوران کئی شعبوں میں معاہدے طے پانے کی امید رکھتے ہیں تاکہ دونوں ممالک میں سرمایہ کاری کو فروغ دیا جا سکے ۔یہ دورہ سعودی عرب کی جانب سے اپنی معیشت کو متنوع بنانے اور اسے عالمی سرمایہ کاری اور تجارت کا مرکز بنانے کی مسلسل کوششوں کا حصہ ہے۔سعودی عرب براہِ راست غیر ملکی سرمایہ کاری کو متوجہ کرنے، ابھرتے ہوئے شعبوں کو فروغ دینے اور بیرونی سرمایہ کاری کو وسعت دینے کے لیے کوشاں ہے۔یہ دورہ سعودی عرب اور امریکا کے درمیان مضبوط اور دیرینہ تعلقات کا بھی مظہر ہے جو کئی دہائیوں پر محیط ہیں۔
Short Link: https://urdu.app.com.pk/urdu/?p=594662
