اسلام آباد ۔1نومبر (اے پی پی):نیشنل ٹرانسمیشن اینڈ ڈسپیچ کمپنی لمیٹڈ (این ٹی ڈی سی) نے 500 کے وی ٹرانسمیشن لائن کے ٹو، کے تھری، این کے آئی سرکٹ (17.98 کلومیٹر) اور کے ٹو، کے تھری جامشوروسرکٹ 1 (6.37 کلومیٹر) کی ری کنڈکٹرنگ کا کام مقررہ آخری تاریخ سے پہلے مکمل کر لیا ہے۔این ٹی ڈی سی ہیڈ کوارٹر سے جاری بیان کے مطابق مذکورہ ٹرانسمیشن لائن کو کامیابی سے انرجائز کر دیا گیا ہے۔500کے وی ٹرانسمیشن لائن کی ری کنڈکٹرنگ کا کام 50 روز میں مکمل کیا گیا ہے جو کہ 75 دن کے کنٹریکٹ کی تکمیل کی مدت سے 25 دن کم ہے۔
اس دوران انجام دی جانے والی اہم سرگرمیوں میں 24.35 کلومیٹر طویل پرانے اورخستہ حال کنڈکٹر کی تبدیلی اور ری کنڈکٹرنگ، 71 ٹاورز پر پرانے، خراب ہارڈ ویئر اور انسولیٹرز کی تبدیلی،24.51 کلومیٹر طویل شیلڈ وائر کی تبدیلی اور 24.94کلومیٹر طویل آپٹیکل گراونڈ وائر (او پی جی ڈبلیو) کی تنصیب شامل ہے۔اس کے علاوہ 6 ٹاورز کی بنیادیں رکھنے اور تعمیر کا کام اور 4 پرانے ٹاورز کو گرانے کا کام بھی مکمل کیا گیا۔منیجنگ ڈائریکٹر این ٹی ڈی سی انجینئر ڈاکٹر رانا عبدالجبار خان نے اہم ترین منصوبے کو مقررہ تاریخ سے پہلے مکمل کرنے پر متعلقہ این ٹی ڈی سی ٹیم کی کاوشوں کو سراہا ہے۔
