اسلام آباد۔23فروری (اے پی پی):وزیر اعظم محمد شہباز شریف کی ہدایت پرنیشنل ڈیزاسٹر مینجمنٹ اتھارٹی (این ڈی ایم اے)کی جانب سے فلسطین، لبنان اور شام کی جنگ زدہ عوام کے لیے فلاحی بنیادوں پر امداد کی فراہمی کا سلسلہ جاری ہے۔
اتوار کو نیشنل ڈیزاسڑ مینجمنٹ اتھارٹی کی جانب سے جاری بیان کے مطابق این ڈی ایم اے اورالخدمت فاؤنڈیشن کی مشترکہ کاوش سے روانہ کی گئی 14ویں امدادی کھیپ میں ٹینٹ،گرم خیمے، ترپال اورطبی سامان پر مشتمل100 ٹن سامان فلسطین کیلئے روانہ کیا گیا ہے جبکہ مجموعی طور پر مشرق وسطی کے لیے یہ 25ویں امدادی کھیپ روانہ کی گئی ہے۔
امدادی سامان بذریعہ ہوائی جہاز جناح انٹر نیشنل ائیرپورٹ کراچی سے شام کے لیے روانہ کیا گیا۔ امدادی سامان کی روانگی کی تقریب میں این ڈی ایم اے، وزارت خارجہ اور الخدمت فاؤنڈیشن کے نمائندگان شریک تھے۔وزیر اعظم محمد شہباز شریف کی ہدایت پر فلسطین، لبنان اور شام کے لیے روانہ کی گئی25امدادی کھیپوں میں کل1961 ٹن امدادی سامان روانہ کیا گیا جس میں فلسطین کے لیے 1478ٹن،لبنان کے لیے 372ٹن جبکہ شام کے لیے 111 ٹن سامان روانہ کیا جا چکا ہے۔
حکومت پاکستان فلسطین اور مشرق وسطی کی جنگ زدہ عوام کی ضروریات کے مطابق امدادی سامان بھیجنے کے سلسلے کو جاری رکھے ہوئے ہے۔
Short Link: https://urdu.app.com.pk/urdu/?p=565138
