اسلام آباد۔20مارچ (اے پی پی):سپیکر قومی اسمبلی سردار ایاز صادق سے جمعرات کو ہاورڈ یونیورسٹی امریکہ کی طلبا ایسوسی ایشن کے وفد نے ملاقات کی ۔سپیکر نے وفد کو پارلیمان میں ہونے والی قانون سازی،اہم قومی علاقائی اور عالمی امور پر طلبا کو پاکستان کے نقطہ نظر سے آگاہ کیا۔ سپیکر نے وفد سے بات چیت کرتے ہوئے کہا کہ پاکستان کو دہشتگردی اور موسمیاتی تبدیلیوں جیسے سنگین خطرات کا سامنا ہے۔پڑوسی ملک افغانستان کی سرزمین پاکستان کے خلاف دہشتگردی کیلئے استعمال ہو رہی ہے۔افغانستان دہشت گردوں کی محفوظ آماجگاہ بنا ہوا ہے ۔ پاکستان میں دہشت گردی کی آگ خطے کے دیگر ممالک تک بھی پھیل سکتی ہے ۔
انہوں نے کہا کہ اس آگ سے پھر ہمسایہ ممالک بھی محفوظ نہیں رہیں گے، دنیا کو اس کا نوٹس لینا ہوگا ۔پاکستان متعدد بار افغان عبوری حکومت کو دہشت گرد تنظیموں کے خلاف شواہد دے چکا ہے ۔افغان سرزمین کے پاکستان کے خلاف استعمال کا معاملہ متعدد مواقع پر اقوام متحدہ میں بھی اٹھایا۔اعلی امریکی عہدے داروں کو بھی اس تشویشناک صورتحال سے آگاہی دی گئی ہے ۔
دہشت گرد افغانستان میں چھوڑا گیا جدید ترین امریکی اسلحہ استعمال کررہے ہیں۔پاکستان کی بہادر سکیورٹی فورسز دہشتگردی سے نبردآزما ہیں۔ پاکستان نے دہشتگردی کے خلاف جنگ میں بھاری قیمت چکائی ہے۔قوم اور سکیورٹی فورسز نے دہشتگردی کی جنگ میں 90 ہزار سے زیادہ جانوں کا نذرانہ پیش کیا ہے۔پاکستان پڑوسی ممالک کے ساتھ خوشگوار تعلقات کا خواہاں ہے۔ پاکستان نے طویل عرصے تک 4.6 ملین افغان مہاجرین کا بوجھ اٹھایا ہے ۔پاکستان میں جمہوریت بتدریج آگے بڑھ رہی ہے۔
پاکستان دنیا میں موسمیاتی تبدیلیوں سے متاثر ہونے والے ممالک میں صف اول میں شامل ہے۔2022میں پاکستان کے پسماندہ علاقوں میں موسمیاتی تبدیلیوں سے بے پناہ جانی اور مالی نقصان ہوا۔2017 میں ملک کے وزیراعظم کو اپنے بیٹے سے تنخواہ نہ لینے پر نااہل کیا گیا تھا۔ آج بھی اپوزیشن کی بڑی جماعت حکومت کو جعلی اور غیر قانونی قرار دیتی ہے۔ اپوزیشن اسی پارلیمان میں قائد حزب اختلاف، چیئرمین پی اے سی اور قائمہ کمیٹیوں کے چیئرمینوں کے عہدوں پر بھی براجمان ہے۔
اپوزیشن نے صرف پوائنٹ سکورنگ کی ایک بار بھی عوامی اور ملکی مسائل پر بات نہیں کی۔ بطور کسٹوڈین آف ہاؤس ایوان کو ہمیشہ غیر جانبداری سے چلایا۔ اپوزیشن کو حکومت سے زیادہ ٹائم دیا جبکہ پروڈکشن آرڈرز کے معاملے پر ایک قدم آگے بڑھ کر فیصلہ کیا۔سوشل میڈیا پر پاکستان کی مثبت عکاسی نہیں کی جاتی۔ پاکستان کے حقیقی تشخص کا پتہ پاکستان میں آکر چلتا ہے۔
Short Link: https://urdu.app.com.pk/urdu/?p=574576
