لاڑکانہ۔2دسمبر (اے پی پی):برج کنسلٹنٹ فاؤنڈیشن کی جانب سے اقوام متحدہ کے ترقیاتی پروگرام (یو این ڈی پی) کے تعاون سے آرٹس کونسل لاڑکانہ میں ایچ آئی وی ایڈز کا عالمی دن منایا گیا۔اس موقع پر ایچ آئی وی اور ایڈز کے بارے میں آگاہی پیدا کرنے کے لیے سیمینار کا انعقاد کیا گیاجس میں لاڑکانہ ڈسٹرکٹ کونسل کے چیئرمین اعجاز احمد لغاری اور مختلف رہنماؤں سمیت کئی معززین نے شرکت کی۔مقررین نے اس بات پر زور دیا کہ ایچ آئی وی اور ایڈز کو باقاعدہ علاج کے ذریعے مؤثر طریقے سے کنٹرول کیا جا سکتا ہے۔
انہوں نے بتایا کہ یہ بیماری غیر محفوظ طریقوں جیسے کہ سرنجوں کے دوبارہ استعمال، بغیر ٹیسٹ شدہ خون کی منتقلی اور طبی آلات سے پھیل سکتی ہے۔سندھ ایڈز کنٹرول پروگرام (ایس اے سی پی) کے مطابق 30 نومبر تک رتوڈیرو اے ٹی سینٹر میں 42,000 سے زیادہ لوگوں کی ایچ آئی وی کی اسکریننگ کی گئی ہے، جن میں سے 1,438 کا مثبت ٹیسٹ آیا۔ان میں 1076 بچے تھے جن میں 666 لڑکے اور 410 لڑکیاں شامل تھیں۔ اعجاز احمد لغاری نے کہا کہ سندھ حکومت نے ایچ آئی وی/ایڈز کے مریضوں کو جامع علاج فراہم کرنے کے لیے دو اے آر ٹی سینٹرز قائم کیے ہیں، ایک رتوڈیرو اور دوسرا لاڑکانہ میں ہے۔
انہوں نے کمیونٹی پر زور دیا کہ وہ اس بیماری کے بارے میں بیداری پھیلانے کی کوششوں میں شامل ہوں،خاص طور پر دیہی علاقوں میں آگاہی کی ضرورت ہے۔انہوں نے کہا کہ ایک انسان کی جان بچانا پوری انسانیت کی جان بچانا ہے۔ انہوں نے وضاحت کی کہ ایچ آئی وی جسم کے مدافعتی نظام پر حملہ کرتا ہے اور جب یہ بڑھتا ہے تو یہ ایڈز کا باعث بنتا ہے۔اس حوالے سے مقامی تنظیمیں، بشمول برج فاؤنڈیشن، ہمراز اور نیو لائف لاڑکانہ سمیت دیگر شہروں میں ایچ آئی وی/ایڈز سے نمٹنے کے لیے سرگرم عمل ہیں۔تقریب کا اختتام ایچ آئی وی/ایڈز سے متاثرہ افراد کے اعزاز میں شمع روشن کرنے کے ساتھ ہوا۔ بعد ازاں ایک آگاہی واک کا انعقاد کیا گیا جس میں مرد اور خواتین نے بڑی تعداد میں شرکت کی۔
