اسلام آباد۔ 01:دسمبر (اے پی پی):صدر مملکت ڈاکٹر عارف علوی نے ایچ آئی وی ایڈز کے خلاف پاکستان کے قومی رسپانس کو بہتر بنانے، ڈیٹا پر مبنی جدید حل اختیار کرنے اور اس بیماری کے بارے میں پائے جانے والے منفی رویوں اور امتیازی سلوک کا خاتمہ کرنے کے عزم کا اعادہ کرتے ہوئے کہا ہے کہ پاکستان کو ایچ آئی وی سے پاک بنانے کے سفر میں ہمیں مستقبل کے بےشمار مواقع سے فائدہ اٹھانے کیلئے ماضی کی کامیابیوں اور چیلنجز پر بھی غور کرنا ہوگا، پاکستان ہر عمر اور پس منظر سے تعلق رکھنے والے افراد کی صحت سہولیات تک رسائی بڑھانے اور انہیں ایک صحت مند طرز ِزندگی کا انتخاب کرنے کیلئے بااختیار بنانے کی کوششیں جاری رکھے گا۔
ایڈز کے عالمی دن یکم دسمبر 2023 ء کے موقع پر اپنے پیغام میں صدر مملکت نے کہا کہ آج ایڈز کے خاتمے کا عالمی دن "کمیونٹیز کو رہنمائی کرنے دیں” کے عنوان سے منایا جا رہا ہے، یہ دن منانے کا مقصد ایڈز کے خاتمے میں کمیونٹیز کے کردار کو اجاگر کرنا ہے ، یہ دن ہمیں یاددہانی کراتا ہے کہ ایچ آئی وی کے خاتمے کیلئے کمیونٹی کی سطح پر اجتماعی کوششوں، بصیرت اور انتہائی پسماندہ آبادی تک صحت کی خدمات پہنچانے کی ضرورت ہے۔
انہوں نے کہا کہ آج کے دن ہم ایچ آئی وی کے خلاف قومی رسپانس بہتر بنانے ، ڈیٹا پر مبنی جدید حل اپنانے اور اس بیماری کے بارے میں پائے جانے والے منفی رویوں اور امتیازی سلوک کا خاتمہ کرنے کے عزم کا اعادہ کرتے ہیں،آج ہم صحت کا نظام مستحکم کرنے ، نئے انفیکشن کم کرنے ، ثبوت پر مبنی پالیسیاں اور منصوبے اپنانے اور ان پر عمل کرنے کے عزم کی بھی توثیق کرتے ہیں، یہ دن ہمیں ایچ آئی وی کی روک تھام، تشخیص اور علاج تک رسائی یقینی بنانے کی ہماری بنیادی ذمہ داری کی بھی یاد دلاتا ہے۔
صدر عارف علوی نے کہا کہ پاکستان قومی سماجی تحفظ کے پروگراموں کے تحت جامع صحت، غذائیت اور سپورٹ سروس پیکجز کی مدد سے ایچ آئی وی سے متاثرہ تمام افراد کو تحفظِ صحت فراہم کرنے کیلئے کام کر رہا ہے، اس بیماری سے نہ صرف بچا جا سکتا ہے بلکہ اس کاعلاج بھی ممکن ہے اور ہمارے پاس اس بیماری سے متاثرہ افراد کا معیار زندگی بہتر بنانے کی صلاحیت اور عزم بھی موجود ہے، آج ہم پاکستان میں ایڈز کی وجہ سے بدنامی اور امتیازی سلوک کا خاتمہ یقینی بنانے کیلئے عزم کا بھی اظہار کرتے ہیں ۔
صدر نے کہا کہ میں تمام سٹیک ہولڈرز، بشمول میڈیا ، بااثر افراد اور کمیونٹی رہنماؤں پر زور دینا چاہوں گا کہ وہ اس بیماری کے پھیلاؤ کو روکنے کیلئے آگاہی پیدا کریں، ہمیں ایچ آئی وی کی منتقلی کی روک تھام، نگرانی کا نظام قائم کرنے، اس بیماری سے جڑے منفی تصورات ختم کرنے، صحت کے عملے کو تربیت دینے اور اپنے ادارہ جاتی ڈھانچے کو مضبوط بنانے کیلئے اپنی کوششیں تیز کرنے کی ضرورت ہے۔
صدر مملکت نے کہا کہ پاکستان کو ایچ آئی وی سے پاک بنانے کے اس سفر میں ہمیں مستقبل کے بےشمار مواقع سے فائدہ اٹھانے کیلئے ماضی کی کامیابیوں اور چیلنجز پر بھی غور کرنا ہوگا، پاکستان ہر عمر اور پس منظر سے تعلق رکھنے والے افراد کی صحت سہولیات تک رسائی بڑھانے اور انہیں ایک صحت مند طرز ِزندگی کا انتخاب کرنے کیلئے بااختیار بنانے کیلئے اپنی کوششیں جاری رکھے گا، ہم صحت کے نظام میں پائے جانے والے تفاوت کو دور کرنے اور ایچ آئی وی سہولیات تک رسائی بہتر بنانے کے عزم کی تجدید کرتے ہیں، آئیں، ہم سب ملک کر ایک روشن اور صحت مند مستقبل کیلئے راستہ ہموار کریں۔
Short Link: https://urdu.app.com.pk/urdu/?p=415561
