اسلام آباد۔10نومبر (اے پی پی):ہائر ایجوکیشن کمیشن (ایچ ای سی)نے ہائر ایجوکیشن ڈویلپمنٹ ان پاکستان (ایچ ای ڈی پی)پراجیکٹ کے تحت پبلک سیکٹر یونیورسٹیوں کے لئے مالیاتی خودمختاری اور ریونیو جنریشن کے حوالے سے ایک وسیع صلاحیت سازی سیشن کا انعقاد کیا۔ اس کا مقصد اعلیٰ تعلیم کے اداروں کی حوصلہ افزائی کرنا تھا کہ وہ ایسے منصوبے تیار کریں جو انہیں اپنے طور پر فنڈز اور آمدنی پیدا کرنے کے قابل بنائیں۔ سیشن میں مختلف پبلک سیکٹر کی یونیورسٹیوں کے وائس چانسلرز، خزانچی اور رجسٹرار سمیت 75 سینئر فنانس حکام نے شرکت کی۔
ورکشاپ میں 26 اعلیٰ تعلیم کے اداروں پر توجہ مرکوز کی گئی ۔ پاکستان میں اعلیٰ تعلیم کے شعبے کے لئے عوامی فنڈز کی مختص رقم بین الاقوامی معیار کے مقابلے میں کم ہے، پاکستان کے قومی بجٹ پر دیگر شعبوں کے مسابقتی مطالبات کی وجہ سے صورتحال بدستور کمزور ہے۔ مزید برآں سندھ کے علاوہ صوبائی حکومتوں کی طرف سے ایچ ای آئیز کے لئے مالی تعاون بھی نہ ہونے کے برابر ہے۔ اس کا ادراک کرتے ہوئے ایچ ای سی اعلیٰ تعلیم کے اداروں کی حوصلہ افزائی کر رہا ہے کہ وہ غیر روایتی ذرائع سے حاصل ہونے والی آمدنی کو حکومتی گرانٹس اور طلبا کی فیسوں سے بڑھائیں۔
یہ ایچ ای ڈی پی منصوبے کے کلیدی ترقیاتی مقاصد میں سے ایک ہے جہاں اعلیٰ تعلیم کے شعبے کی گورننس کو ریونیو میں تنوع اور غیر روایتی ذرائع سے فنڈ کی فراہمی کے ذریعے مضبوط کیا جانا ہے۔ اس کے مطابق پاکستان بھر میں تقریباً ایک سو اعلیٰ تعلیم کے اداروں کے ساتھ مشاورت کے بعد دو فریم ورک تیار کئے گئے ہیں ان میں سے ایک ریونیو میں اضافہ اور فنڈ جنریشن کے لئے اور دوسرا پبلک سیکٹر یونیورسٹیوں کے لئے مالیاتی خود مختاری کو بہتر بنانے کے لئے تیار کیا گیا۔ پاکستان بھر سے اعلیٰ تعلیم کے سرکاری اداروں کی سینئر مینجمنٹ پر مشتمل متعلقہ سٹیک ہولڈرز اس ڈرافٹ فریم ورک پر نظرثانی، بہتری اور رائے فراہم کرنے میں مصروف ہیں۔
قانونی اور ادارہ جاتی چیلنجوں کے باوجود کچھ اعلیٰ تعلیم کے اداروں نے اس اقدام پر خاطر خواہ پیشرفت کی ہے اور اپنی مختصر پیشکشوں میں انہوں نے اپنے پروجیکٹ کے خیالات کا اظہار کیا ہے جس سے دوسرے فائدہ اٹھا سکتے ہیں۔ ان میں خیبر میڈیکل یونیورسٹی پشاور، یونیورسٹی آف انجینئرنگ اینڈ ٹیکنالوجی لاہور، یو ای ٹی ٹیکسلا، ہزارہ یونیورسٹی مانسہرہ، آئی بی اے سکھر، یونیورسٹی آف سرگودہا اور قراقرم انٹرنیشنل یونیورسٹی گلگت شامل ہیں۔ بلوچستان یونیورسٹی انفارمیشن ٹیکنالوجی، انجینئرنگ اینڈ مینجمنٹ سائنسز کے وائس چانسلر ڈاکٹر خالد حفیظ اور وائس چانسلر ہزارہ یونیورسٹی ڈاکٹرجمیل احمد اس موقع پر مہمان خصوصی تھے۔
انہوں نے فنڈنگ کے اس موقع سے زیادہ سے زیادہ فائدہ اٹھانے کے لئے کئی مقامی اور بین الاقوامی مثالیں شیئر کیں۔ پراجیکٹ کوآرڈینیٹر ایچ ای ڈی پی ڈاکٹر مسعود حسین نے مغرب اور پڑوسی ممالک کی مثالیں دیتے ہوئے کہا کہ کس طرح انہوں نے یہ سفر برسوں پہلے شروع کیا اور اب اس سے مستفید ہو رہے ہیں۔ ممبران کو یہ بھی بتایا گیا کہ مجموعی طور پر 100 سے زائد اعلیٰ تعلیم کے اداروں کو ان کی آئی ٹی کی تیاری پر توجہ مرکوز کرتے ہوئے خاطر خواہ مالی مدد دی گئی اور انہیں خود کو پائیدار بنایا گیا۔ یہ پبلک سیکٹر یونیورسٹیوں کے لئے ایچ ای سی کے باقاعدہ سلسلے کی جانب سے پبلک گرانٹ فنڈنگ کے علاوہ ہے۔
ایچ ای ڈی پی ایک پانچ سالہ منصوبہ ہے ، (20۔2019، 24۔2023) جسے ایچ ای سی نے اپنی اہم اعلیٰ تعلیم کی ترجیحات کو وسعت دینے کے لئے نافذ کیا ہے۔ اس کا مقصد معیشت کے سٹریٹجک شعبوں میں تحقیق کی عمدگی کی حمایت کرنا، تدریس اور سیکھنے میں بہتری لانا اور اعلیٰ تعلیم میں حکمرانی کو مضبوط بنانا ہے۔
